مجالس الفرده - مساجلة سريعه

في رمضان الماضي ارسل لي الاخ والصديق عبد الرحمن بن عبد الدايم بن رويشد الفريدي
الابيات الثلاثة الاولى هنا .. فكانت هذه المحاوره

عبد الرحمن:

ياقلب لاتحزن ترى الكون محكوم=بيدين من سير بك الدم صافي
اوصيك لاتبغض ولو كنت مظلوم=خلك دوامٍ للمحبين وافي
البغض يرفع ضغط ويهبّط عزوم=ويحط مابين القرابه تجافي

0000
جوابي:

ياصاحبي ماقلت واضح ومفهوم=ماهو علينا يا ابيض الوجه خافي
احيانٍ الطيبه بها الحق مهضوم=باسبابها تمشي على الحيد حافي
خصٍّ ليا جابه قريبٍ من القوم=ياضربةٍ ما من بَعَدها تشافي
ولا تهمك الدنيا مقر ناعق البوم=نحبها رغبه ونـترك عيافي
واوصيك لاتكثر على نفسك اللوم=العيّ عيٍّ والسنافي سنافي
ولا تذمر لو غطا جوك غيوم=يمكن تبيّن بالنهايه .. عوافي

0000
عبد الرحمن :

ياذيب والله مانت في وجهة الحوم=ولا فيه شيٍّ يحتمل طرق قافي
لكن اروض قسوة النفس والوم=نصيحةٍ للقلب لايصير جافي
من قبل لايبنى على جسمه ردوم=وتذرا عليه من الهبايب سوافي
00000000

جوابي :

ونستني بالحيل ياباشة الروم=والحمد لله يوم صارت عوافي
رمعة لي رمعه وانا كنت مهموم=لكن جوابك لاعدمناك كافي
ياصايمٍ يثّر بك الصبر والصوم=ماكنك الا بين سعي وطوافي!!
وما دام ابو مره مربّط ومخزوم=نسالك يالمعبود حسن الملافي
00000