ياأبو سمو وين أهل السلم والجود=وين الرجال اللي يذري ذراها
وين الزحول مزبنة كل مضهود=ماأبعد مسافتها وماأبعد قراها
البارحة جفني عن النوم محدود=تحده هجوسً تزاحم سراها
تاخذ بي الأفكار سجات وتعود=وليا عودت تضفي لقلبي بلاها
لو نأخذ الدنيا بحيلات وجهود=يمدي ملكنا وملكنا مايضاهى
مار النفوس تشوم عن كل منقود=ووجيهنا تكرم وتكرم لحاها
راضين بالمقسوم والنقص والزود=وترى القناعة كنز متحدن لقاها

يامرحبا ترحيبةً أحلا من العود=أحلا من العود المنقا شذاها
جتني بيوتً تعتلي كل منقود=من صاحبٍ جزل المعاني بناها
دنياك هذي كلها صد وجحود=صعبة على الطيب بعيدٍ مداها
يعيش فيها كل هافي ونمرود=واللي دروب المرجلة مابغاها
أصبر ترى في تالي الصبر مردود=لعل نفس الحر تلقى مناها