حبيت راس عبيد من طيب قافـه=عز الله ان عبيد بالشعر بيطـار
ياسامعي كـانٍ عنـدك حرافـه=لاضفت الالف لوالده يطلع انهار
يازين نظمه للمثل يـوم حافـه=تقول من غال الجواهـر والادرار
الشرّد الفـرّد عسفهـن عسافـه=اللي لهن عند اهل العرف مقـدار
والا قليل العرف عنـده حسافـه=وراع الولع ياعبيد عنده لهن كار
الجوهر الغالي صعيب اكتشافـه=كود الذي مثلك بعيدات الاوكـار
يابعد بالشعّـار فـرق المسافـه=لاشك مايدرون عميان الابصـار
احدٍ بنظم القيـل عنـده كلافـه=واحدٍ اليا من قال قيله طلع عـار
بعض قصيد اليوم نفسي تعافـه=لامبيـنٍ حكمـه ولافيـه تعبـار
كل الكلام اللي يجيبـه سخافـه=في فكرتي لوتختلف فيه الافكـار
وسلمت يامن شاقني صوغ قافه=من غيهبٍ جوهر معانيـه فـوّار
ياعبيد كل اللي تقولـه طرافـه=الله يبقى فيك يـاواف الاشبـار
يابو محمـد ياحريـب الضعافـه=ارج السموحه منك يانسل الاحرار
وعداد مايسعـى وكمّـل طوافـه=ازكى سلام لقايد الغـر الابـرار

قدر الوفاء ياحمود ماهـي زهافـه=ومن طيب ذاتك يابعـد كـل قمـار
ابيض احساسٍ ناصعٍ مـع نظافـه=ميدان ميـراد المشاعـر ومصـدار
لبّستني تاجٍ علـى الـراس شافـه=اللي حضر واللي قراهن بالاسطـار
روايعٍ من نقـد سـوق الصرافـه=واحد وعشرين الذهب قيس وعيار
منظـوم بـرديٍ ويحمـل اغلافـه=توقيع يمنىً ما تجيها سنـى النـار
يمنىً تجود بوقت قاسـي اعجافـه=يمنى حمود الطايله سـر وجهـار
الشعر زهـره قـد قطفتـه قطافـه==قبلي نظمت من اجزله عذب الاشعار
بحرٍ تباعـد غبتـه عـن طفافـه=اليا صفق كنه غضب ريح الاعصار
من زرق غبات المحيـط اكتشافـه=بمتابعة عبر الفضاء كـل الاقمـار
مامر فـي دربـه تمثنـى وطافـه=عنه اعلنوا حال الطواري والانـذار
لك في رجومـه وقفـةٍ وانحرافـه=ولك في صحاريه البعيدات معبـار
تصـوغ جزلاتـه بلـيـا كـلافـه=ماتجبر المعنـى بتركيبـه اجبـار
ولولا التضارب بالنظـر واختلافـه=كان السلع بارت وسوق السلع بار

بسم الـذي امـره بنونـه وكافـه=ربٍ خلـق متكفـلٍ رزق الابـشـار
نرجيه ونطلـب رحمتـه والمرافـه=بيومٍ عبوسٍ شاخصه فيه الابصـار
من بعـد ذكـره نستعيـن ونخافـه=ونساله التوفيـق مـع كـل معبـار
وهيضني المعنـى بـدون انجرافـه=ولاني من اللـي يدفعـه كـل تيـار
قافٍ لبـو ناصـر جديـد الصرافـه=وعن عملـة الليـرة تخيـرت دولار
اللي نظم لـه قـاف يازيـن قافـه=ويازين نظم القاف في بدع الاشعـار
صبت الهدف ما اخطيت قول النصافه=بالاولـه والثانيـه زحـت الاستـار
بعض الكلام لاجـاك فيـه الجحافـه=بالمدح والا القدح مـا عنـه ينـدار
وعن جائزة نوبل كفتنـا الصحافـه=وانا اتكلم عنـه موجـز بالاخبـار
تبا الصراحـه شـد قافـه وحافـه=وسكر مجال النقد عـن كـل هـذار
هذي شهادة حـق مـا هـي لقافـه=ياعبيد لـك منـي تحيـات ومجـار
وشهـادة العرّيـف علـم وثقافـه=ياعبيد تماري بهـا بيـن الاقطـار