قالوا نبـي مـن قصايـدك الغراميـه=قلت الهـواء والغـزل قفلـت بيبانـه
انـا مـن الليلـه افكـاري أسمنتيـه=حديـد وبلـك وسمنـت وخرسـانـه
ولاعاد لي هـم شاغـل غيـر هاذيـه=قواعـد البيـت وجسـوره وعمدانـه
احلـم بفـلا علـى ذوقـي خيالـيـه =تكـون بيـن المبانـي كنهـا دانــه
انسى بها ايامـي اللـي شيبـت فيّـه =ويصير لي مع هواميـر البلـد خانـه
احلام ميـر الحقايـق جـات عكسيـه=واصبحـت مديـون والجيـران ديانـه
وقام المقاول يهدر وتضـرس اللحيـه=باحـت فلوسـي وقـام يحـد نيبانـه
من عقب مانـي بعمـه نعنبـو حيـه=اليـوم ماكنـي الاضـمـن صبيـانـه
ان قلت راع الظـروف وزيّـن النيـه=واصبر وياصلك حقك حومـر اعيانـه
قال ايـه هـاذي سواليـف الحراميـه=هات الدراهم تـرى الاخـلاق تعبانـه
عـودت أعــزم واروّح للشريطـيـه=واخـذ ونيتيـن والتقسيـط بثمـانـه
واعطى المقاول ثمنهـا شبـه جبريـه=والراتب اقساط مـن راسـه لكرعانـه
والورع وامه يبون اشيـاء ضروريـه =والتاجـر احتدنـي مـن دون دكـانـه
يقـول للفقـر فـي نظرتـك مـاريـه =ودفاتر الديـن مـن شـرواك مليانـه
وعـوّدت لاجبـت لاهـاذي ولاذيــه=وعزي لمن راح وانكف ماقضى شانـه
العـذر مايقنـع المحـتـاج مولـيـه =والمزح ماهوب يرضي نـاس زعلانـه
مغير اروّح بهـم فـي كـل عصريـه=للبيـت ونمتـر الاضـلاع واركـانـه
ونحاول نعيش وسـط احـلام ورديـه =مابين غرفـة فـلان وغرفـة فلانـه
وأن مرنـا مـن جماعتنـا الزراويـه=لاشافني قـال ذا ضـاوي وورعانـه
يبغـا الفوائـد وحـول لـه بدهويـه=وقـام يتهكـم وفـيّ يجـرب اللسانـه
طلعـت للشمـس وانـا كنـت بالفيـه=وضحك بي اللي يشح بـزاد ضيفانـه
يازياد مافـي قلـوب النـاس ماويـه=لكـن شكـواى للمعـبـود سبحـانـه

ضـاوي قلبهـا منـاحـه للهـواويـه =وانـا سرتبـي طواريقـه وقيفـانـه
ووردت عـدٍ رشـاه يخاطـف إ دليـه =دلـو تصـدر خفيـف ودلـو مليانـه
وامسيت ادير الفكاير واسـوي النيـه =واصبحت ولْيـا الفـرج فتـاح بيبانـه
ياضاوي الراي عنـدي والعمـل نيـه =الاول الله والاخـو لوقفـة اخـوانـه
ان طعت شوري ترى ربعـك نداويـه =نبـي إنخـل المقـاول يبلـع إلسانـه
نبـا انتعـاون عليـه ونعلـن الهيّـه =ولاشاف ضرب ام خمس ايعرف عمانه
والجايـد إيجـود وارزاقـه سماويـه=والنـاس للنـاس مديونـه وديـانـه
والله مـا صـد والـعـزوه شبابـيـه=تابى المروّه علـى حروبـه وعتبانـه
وكـل القبايـل لهـا الامـداح مثنيـه =والطيّب ونعم مـن حضـره وبدوانـه
ياالله عسى ضـاوي إيختـم الثلاثيـه=ب إسمه ثلاثي .. وبحسابه .. وعنوانه
واللـي يبيـهـا فكاهـيـه فكاهـيـه =لكّـن لاتـروح فلـة ضـاوي إرهانـه