سلام يانواف من قلب ولسان=ياطيب الرفقه بعيد المدالي
قلي عن اللي صار والعلم نيشان=ماقل دل اليا اختصرت المقالي
فياح في وضعه من العام بلشان=وانته فهيم العلم من اول وتالي
يابن خصيوي يالوفي جاك تيبان=مني على اللي حدني واحتدالي
انخاك وانته للمحاويج مزبان=لازلت الشرهات بعض الرجالي
تنصاك يانواف والصاع مليان=ماتنقصه من طيب جودك ايكالي
صاع الوفى لأهل الوفى كيله اعلان=يشاهده بالناس مبغض وغالي
وانا فخور بسيرتك بابن نومان=من دون الاقصى نفتخر بالموالي
ساس الرجل جذاب والفعل برهان=والطيب بين الناس شرق وشمالي
ماهو بمحصور على فلان وفلان=شاسع مداه وفيه جالك مجالي
برهنت عن مافقك ماجور ومعان=ومشكور لك بين الرجال احتفالي
من طيب ذاته ياسلايل كحيلان=جالك على مجناك فعل امتثالي
وطيب الفتى توفيق من عالي الشان=الواحد الوالي عزيز الجلالي
اللي فطر عبده على حق واحسان=وللخير دله عن طريق الضلالي
علام مايخفى على ادراك انسان=علمه احاط بدقها والجلالي
ماخاب من له لد محرج وشفقان=رب المواهب والعطايا الجزالي
لارد شي قاله كن ثم كان=عليه قبل الخلق كل اتكالي
باامره نصيت اللي له بفضله له امكان=طيب وطاب للمواجيب نالي
عليه من طيبه تمثلت شرهان=نواف اليا ناديت له وانتخالي
تهون اليا كادت على كل جابان=وانال مطلوبي على كل حالي
عساه يسلم من صواديف الازمان=اجاره الله من صدوف اليالي
ذخر لنا بالطيب في كل ميدان=ميدان به للطيبين انفعالي
كل(ن) يبرهن عن وجوده ولاهان=نواف بالماجوب ذيب العيالي
وصلاة ربي عد همال الازمان=على نبيا لاظلم الشرك زالي

نايف ابن بادي بدى راس مابان=وهيض شجوني بالحون الزلالي
حلو المعاني صاغها صوغ بالحان=مثل الذهب ودي بها من حلالي
لاهنت يالي بالطواريق فنان=يامرسل الجزلات لهل الجزالي
يالمخرشي على الوفى منت غلطان=قلت السمين وفي مكانه وعالي
قول جزيل ومرسله فكرفهمان=يزها رجال في دروب المعالي
نواف ابن نوامان قوماته اسمان=وانته مثل شرواه تافي وغالي
ورد الثناء لهل الثناء واجب انسان=ولاهو غريبه ياكريم السبالي
الناس لجل الناس تحتاج من كان=وتختار من الذربين مثل البلالي
وانا ظروفي ذكرتني بالازمان=واللي جرالك بابن بادي جرالي
في ساعة محتار والفكر حيران=وسعودها نواف ساعة عنالي
للمشكلة يرسي كما ظلع ببان=متبينن الزين عرب الخوالي
ياما نصيته في ثقيلات الاوزان=ليا شحة الابيار وقصر الحبالي
تسقي يمينه كل عاني وعطشان=ويرسي على المنحاة مثل الجمالي
ياربعتي لي الفخر وانت اخوان=والكل منكم بالمراجل مثالي
اولاد راشد عز راسي والامتان=وليا انتخو بالعود ياهم لآلي
من لابة بوم المغازي والاكوان=فوق المهار ومحتمين التوالي
يوم انها في نجد بسنان وعنان=سقنا جملنا وسط جرد السهالي
من مركز الشعبة على ظلع ورقان=لأجل البكار مدلهات المفاني
واليوم من فضل الولي امن وامان=بحكم السعود ولايجيله زوالي
هذا وانا جاريت نايف على شان=هيض شجوني بالحون الزلالي