راكب اللي كنها البرق في عرض النصـوب=دايـمٍ مسـرى الليالـي علـيـه معلـمـه
بكرة (ن) كن خف يدها على الزور مغصوب=لا عقلها اللـي عسيفـه ماهـي بمخزمـه
وان تساوت واستعدت لها وصف(ن) عجوب=كنها تدي القسـم عنـد قاضـي المحكمـه
وان رفع ركابها الصوت باسلوب(ن) عذوب=ازجلـت ماكنهـا الا هنـوف(ن) محـرمـه
وكنها قشع(ن) تزبر على صـدر الجـذوب=لاخذت في صحيـح البيـد سـك ودرهمـه
ما شريناها من السوق من جيـز الجلـوب=من سلايـل جيـش جـدي ذلـول مكرمـه
تنحـر اللـي كـل ماتبـت عيـا لا يتـوب=صاحب(ن) اغليه جـدا واعـزه واحشمـه
صاحب(ن) من لابة(ن) ما يهابون الحـروب=بني هاجر فخـر الأمجـاد كفـو الملحمـه
مثل ما تجمـع شبابـه عتيبـه والحـروب=بيننـا حلـف وعهـود وعقـود مبـرمـه
كان يا سلطان ناسيـه واصياحـك طنـوب=مرحبـا بـك وانتبـه والـدروب ملغـمـه
والجفا من بين الاصحاب يالصاحب ماهـوب=عيب لاكن غيـره العيـب يااللـي تفهمـه
والصداقة كنز ماهيب تسمـل سمـل ثـوب=وللصديق ان صار ما صار مـا ذوق لحمـه
وله علي ان حده الوقت في الشدات انـوب=ولـي عليـه ان كَـره صاحبـه لا يظلمـه
والرجل لا صار بيته حجر والسـور طـوب=مـا عليـه مـن المنافـق ليـا رز علمـه
عادني من دون روحي ليـا شبـت شبـوب=والا كم وكـم دهانـي رمـوز(ن) مبهمـه
وكم نواني من لصاحيب دجـال(ن) لعـوب=يبي يأخذ خيرة ابلي وانـا اخـذت اغنمـه
ومعرفة بعض الاصاحيب ذنب من الذنـوب=علة(ن)مـن علتـه أون يـا مثقـل دمـه
وعلتـه ماهـي بتنشـاف بالميكروسكـوب=ودك احيانـاً ليـا طـال صوتـه تكتـمـه
والرجل لا صار شيخ(ن) عزيز(ن) ومحسوب=اسـتـوت زلات رجـلـه وزلات اقـدمـه
إيه يا سلطـان والنـاس غالـب ومغلـوب=والأعادي مـن تحاكـى حثينـا فـي فمـه