الحزن سكرة موت.. والموت سكرات =يشرق بها المخلوق بآخر حياته
روحه تروح ويلحق بركب الأموات =حكم العظيم اللي تعالت صفاته
دنيا الفناء فيها تزول الملذات =بين الشقاء والموت ودّه وهاته
دنياً لها في سكة الموت ميقات =من عاش فيها حق يكتب وصاته
فيها عزا.. وحزن.. وفجيعه ولوعات =وفيها ضعيف الدين يفقد ثباته
لا عدت يا يوم على المملكة فات =زعيم الأمة فيه ذاعوا وفاته
صرّح به الديوان تأكيد وإثبات =بيان هز قلوبنا مفرداته
تناقلت بثه جميع المحطات =وكل تأثر في فجيعة مماته
حضرت وفود.. ونكست فيه رايات =وليل التعازي فيه خيّم سكاته
فاضت عيون وضجت قلوب وأصوات =فراق ابو فيصل يبكّي عداته
للعود قفّوا فيه والناس زافات =شالوا عظيم ولحفوه بعباته
هلت على قبره من الدمع عبرات =وكل دعا له يوم صلى صلاته
بقلوبنا.. يبقى الفهد حي ما مات =عاش بقلوب الناس من طيب ذاته
سجّل له التاريخ مجد وبطولات =وأذهل ملوك الأرض في منجزاته
طوّر بلاده في جميع المجالات =والشعب حقق له جميع امنياته
قاد السفينة في عميق المحيطات =وليا عطا مثل البحر مكرماته
وأن هبّت رياح الظروف الصعيبات =يحطّم الصعبه صلابة حصاته
عزومه أصلب من جبال السراوات =يسقي خصومه للقهر والشماته
وان كانها صارت معاند وفزعات =يبشر دخيله لا زبن في نجاته
يا الله يا خلاق سبع السموات =تغفر ذنوبه يوم هذي سماته
وتعين ابو متعب بحمل المهمات =هو ريف شعبه بالحياه وغناته
شال الأمانة من يشيل الثقيلات =ونال لولاء شعبه من أربع جهاته
مقدم هل العوجا ولا به مراوات =اخوان نوره عز منهم ولاته
وسلطان.. سلطان الوفاء والجزيلات =الخير فاله دوم والشر فاته
عضيد أبو متعب عهوده وثيقات =هو سيف عبدالله وقايد حماته
ليث على خصمه تضيق الوسيعات =ليا انتخى كحيلان باكبر خواته
وحنا لهم مثل الدروع الحصينات =والموت لأجل الدار هذي حلاته

ياقلب لو دمّك من الوقـت محـروق=لاتقول انا مالي على الصبـر طاقـه
لو شب في صدري براكيـن وبـروق=ولو كان طعـم الصبـر مـرٍ مذاقـه
بدرا..زعل من له مشاريـه وحقـوق=مـن نايـد الأجنـاب ولاّ الرفـاقـه
وإن جاك ابو وجهين في علم ماثوق=من شـان حاقـد لاتبيـع الصداقـه
بعض العرب عايش على الشم والذوق=وإن شح كـف الوقـت ماسـد فاقـه
الآدمـي مظهـر ومخبـر ومنطـوق=وعن غيـب مكنونـه يدلّـك نطاقـه
والطيب له منهج وله ساس وعروق=والعـود الازرق ميزتـه باحتـراقـه
ولاّ الردي كنّه على الوجه مصفـوق=يبـور بالميقـاف ..خطـو العلاقـه
راس الردى في حبل الأيام مشنـوق=ولا للردي مـع ذود الأجـواد ناقـه
وترى الكمأ يلقاه من شـاف رقـروق=والحسـد داب لـه ملامـس رقاقـه
ولاهو صحيح إن كل مطرود ملحـوق=ولاكـل منهـو صـد قطّـاع ساقـه
كم واحدٍ قلبـه مـن الهـم مفتـوق=وسره عـن الحسـاد محكـم وثاقـه
والناس في تفكيرهـا بينهـا فـروق=ويبقى التشابـه بالإسـم والبطاقـه