لوا خسارت جيبكـم ياهـل الجيـب=بضاعتن جلبت على غيـر سوقـي
يـدور بالشـارع بليـا مواجيـب=أشهب جديدن حوض شوفه يشوقي
كنه عسيـف موميـات العياسيـب=ظامر عسيف مسلسـلات العموقـي
وليا شلع مـع نابيـات الجراهيـب=صاروخ عصرن بعد الأمزان فوقـي
قـدام عجـه نافـذات المشاهيـب=بينـه وبينـه بعـد فـز المروقـي
وبرضه نزول مصخرات المهاريـب=ولا معذوف الملح سـار الفشوقـي
يصنع هوى لو يركـدن الهباهيـب=وليا طوى للبعد عرضـه يضوقـي
جمر الهوى في نابيـات المراقيـب=يوصف على أصطبه سريع اللحوقي
يجوز للصحـرى بعيـد المطاليـب=ليا عارضنـه شامخـات العروقـي
أليا سنم الحمـرور ذار اللواهيـب=وردف عليه من السوافي أشنوقـي
في خد صحرى مابها الحي ومريب=مافيـه غيـر مكونـات الطروقـي
مايطلعنـه ناشـبـات الأداعـيـب=اللي مع الشـارع تجـوز وتلوقـي
ذا واجبن لمقـرب البعـد تقريـب=أليا ضحا سرحـه بعيـده أشلوقـي
جيبن بعيده مثـل حبـل المجاذيـب=وليا طلع مثـل أنحـداره سبوقـي
يطلع أقطوعن مع طريقن أليا هيـب=عسرن يبي ساعات مالـه دنوقـي
وليا سرى مع نايمـات الأشاعيـب=برضن عليها من قمرهـا البهوقـي
متقبلـن سـاد الخيـال المكاهيـب=أليـا نطـح لمشبرقـات البروقـي
في ديرتن يسرح بها عصره الذيب=ورجع ضحى بكره وسيع الشدوقـي
من قـل مايلقـا قريـب المعازيـب=خليـان مافيهـا يـدوج مخلوقـي
مـودي اللـي حيرنـه نواشـيـب=عليه مـن حـرن يتـل السبوقـي
يبي الفضا اللي فيه سوى تجاريـب=واليوم عوق الساق فيـه مخنوقـي
المولع النشبـان مثـل المقاضيـب=كنه قضيب الطيـر عنـد الريوقـي
لا صار تحكمبه أظروفـن مغاليـب=وقلبه على شوفت محبـه شفوقـي
أليـا سقنـه مبعداتـه مشـاريـب=من بعد وظروفـن تـرد وتعوقـي
من ست صيفه مامشنبـه مغاريـب=ولا وجهنبـه يـم شبـل الرموقـي
ذيب الغداري ليل عـج ولحاطيـب=الساري اللـي مايسمـى سروقـي
يبي السفر لاشك عنـده ولا ريـب=يطرد هوى نفسن وقلبـن يتوقـي
يبي ديارن عصرها عنـده أتغيـب=من بعدهـا بقلبـه تلاقـا الفتوقـي
مقرب بعيده عند موف المواجيـب=يجلى عن المحروق ضر الحروقـي
لاكن نهار اليـوم كـورة لواعيـب=يدور الشوارع بيـد كـل مخفوقـي
اللي على راسه نقل صورة العيـب=من نص راسـه للعـلاب محلوقـي
بلوى على مودي غريبه عواقيـب=لو فيه نفسن مات موتـن زهوقـي
ويجوز قدم ألحي حرش العراقيـب=في مهمهن من خاليـات الفلوقـي
هذي حلات الجيب من صح ومصيب=ماهـو عليـه مشوهيـن الخلوقـي
لاهم رجـال ولا بناتـن رعابيـب=ياسـود تعشيهـم ويارمـال ذوقـي