هبت ذعاذيع الصبـا والشمـس مالـت للمغيـب=ولاح الشفق رمز الوداع اللّي مثل لون الخضـاب
عديت في رجم الغلا وانـا مـن الفرقـا صويـب=وان جيت اودّع للرياض ..اموت من طريا الغيـاب
حوّلت ضايق خاطري واسمع بصدري صوت ذيـب=عيني بكت لفراقهـا ..قلبـي مـن الأشـواق ذاب
خمسة عشر عام انقضت واصبحت في حكم الغريب=قرب الرحيل وخاطري مـن حبهـا مايـوم طـاب
ياكثر مافيها اصدقاء..وياما بها لـي مـن قريـب=ناس معادنهـم ذهـب ورجـال دمثيـن الجنـاب
نطاقهـم مثـل العسـل وقلوبهـم مثـل الحليـب=أظما على شوفي لهم واحسـب لفرقاهـم حسـاب
ضحّيت في مستقبلي كلّـه علـى شـان الحبيـب=اخوي حسبت والدي ملزوم اخدمـه يـوم شـاب
ترخص له الدنيا واجي لرضاه لو وضعي صعيـب=واوصّي عيالي عليـه إن حطّنـي تحـت التـراب
ولاني مطيع اللّي يقول ان الزمن (جحّـاد طيـب)=لو قالهـا شاعـر فحـل لكنهـا ماهـي صـواب
العيـب ماهـو بالزمـان يطيـب ولاّ مايطـيـب=العيب في طبع البشـر والوقـت يكتـب بالكتـاب
يبيّن اطبـاع البشـر ويـداوي الجـرح العطيـب=وجوّه تراوح حالتـه بيـن الصحـاوه والضبـاب
والطيب ماحدٍ يجحـده ياغيـر مـردي النصيـب=اللّي يحس إن الوفاء والجود نـوع مـن العـذاب
هذاك تقطع ساقته..ويحط فـوق اسمـه صليـب=إن جاء ماهـو يامرحبـا وان راح علّـه للذهـاب
والبخل هو ساس الردى من دون شك ودون ريـب=وبيت الردى من خلقـت الدنيـا تعـداه الركـاب
اللّي يبي وسم الـردى يلقـاه بالوجـه الغضيـب=وجهٍ يفور من الحسد دمّه ليـا شـاف السحـاب
واللّي يبي حلو النبا والجـود والصـدر الرحيـب=ينشد عنه حجرف وابن ناحل ويلقـى لـه جـواب
والوجد هو سم الغلا من يمرضـه مالـه طبيـبب=الذات لاضـاع الأمـل والحلـم بعيونـه سـراب
يقوله اللّي جاوب الورقا علـى خضـر العسيـب=ونزف خفوقه للزمن قصّـة غيابـه يـوم غـاب