مرحوم ياشيخ ٍ ولو غاب موجود=شيخ ٍ مناهج سيرته مستقيمه
الشيخ ابو فالح بالافعال محمود=اللي على فرقاه -كبده- سقيمه
شيخ ٍ بنى دار ٍ له اركان وحدود=بالصبر والاصرار واقوى عزيمه
ومرحوم يافالح فتى الطيب والجود=يمين ابوه ومستشاره ...نديمه
النادر اللي ما وطا درب منقود=دين ورجوله...والطبايع كريمه
عسى السحاب اليا اختلط برق ورعود=يمطر على القبرين..ويصير ديمه
ولا مات من عقّب صناديد وفهود= عقّب شغاميم ٍ تسد الثليمه

الكاف.. كلي جيتكم حب واشواق=الله يهوّن لهفتي ..واندفاعي
والباء.. بدعت القاف رايق ومشتاق=وعلى صواري الحب رفرف شراعي
والدّا...دليلي نابض ٍ جوف الاعماق=قلب ٍ يعبّر عنه.. نزف اليراعي
كبد...ومكانة كبد في وسط الاحداق=كبد القصيم.. اللي تمد الذراعي
لضيوفها الغالين والحب دفاق=حبّ ٍ اهلها ...يعلنونه جماعي
والليله الفرحه لها اشكال وارناق=واللي يزينها ..جميل المساعي
والملتقى ساسه على خير واشراق=فكره وتنفيذ ..ومكان اجتماعي
برنامج ٍ مدروس ..ولكل الاذواق=وبراعة التنظيم ...مابه نزاعي
فعاليات ٍ تحتوي كل ما لاق=وتعطي عن الاهداف احلى انطباعي
موايد ٍ للخير من كل الاطباق=الذ واحلى ...من حليب المراعي
وللخير عشاقه وللشر عشاق=عرفت هذا ..بخبرتي واطلاعي
حنّا بوقت ٍ فيه تكسير الاطواق=وتطلّ من جوّاه ..روس الافاعي
والحق عانا فيه من لوي الاعناق=واصبح مجاله للدعاوي مشاعي
والجو سيله يغرق اليابس اغراق=بالصوت والصوره وبثّ ٍ اذاعي
تخالطت اصوات واهداف وابواق=ولا بد من تحصين خط الدفاعي
وكل الشكر للي تحمّلْ عملْ شاق=واللي بذل مجهود ساعي وداعي
واللي تكبّد عنوة البعد وارهاق=واللي له المعروف داعم وراعي
والنفس ما طابت ولا خاطري ضاق=لكن حدود الوقت رهن اتباعي
وصلوا على المختار ما لاح براق=وعد النجوم اللي تبث الشعاعي

اجمل ختام ..وصفّقت كبد ...للكلْ=لضيوفها ...ورجالها المخلصيني
تضحك غنج ..يزها بها الزين والدّلْ=ويحق لك يا كبد ..هاذي يميني
ما دام رجالك ..للثقايل تحمّلْ=وعند اللوازم ...كلهم جاهزيني
عجزت اميّز!!!بين مخطي ومدّلْ=هذا وهذا !!....كلهم طيبيني
عشرة ايام ٍ نشرب الحب ونعلّ=بضيافة رجال الوفاء ..الغانميني
في ملتقى كبد القصيم ..المكمّل=اللي مثل هدّاج ...له وارديني
وجات النقاط الخمس بالوجه الاكمل=بجهود ربع ٍ .. للبلد وافييني
تفاؤل وترفيه وايضا تواصل=وتثقيف ...والتثقيف دنيا وديني
واليوم للتكريم صوت ٍ مجلجل=صوت ٍ صداه يدوم ..عدة سنيني
ويا شاعر المليون مهما تجمّل=لك شاطي الراحه... ولي راحتيني
لو كنت تطلب بيرق العز صامل=رفعت راية كبد ...بالساعديني
دار الوفاء والحب للطّيب مدهل=لو نبتعد عنها ...يزيد الحنيني
ونبي ندوّن كلمةْ اعجابْ بسْجلْ=وسجلّكم ياضيوفْ... صفحة جبيني
قولوا لبو راكان ...شكراً مجمّل=والشكر موصول ٍ ... بعقد ٍ ثميني
لكل الحديد ..اللي كرمهم كما الطّل=وايضا الشباب اللي معه قايميني
وحان الوداع ..ولوّح القلب للكلْ=مع السلامه ....علّكم سالميني

صح لسانك يا الفريد
والله يرحم العم محمد بن حديد
وابن العم فالح بن حديد
وربي القدير يوفق عياله اللي رافعين راسنا
بوسط الاهل والاجناب