مجالس الفرده - مصافحة أولى .. وإهداء خاص

مجالس الفرده (http://www.alfredah.net/forum/)

- مجلس الشعر الخاص (http://www.alfredah.net/forum/alfredah33/)

- - مصافحة أولى .. وإهداء خاص (http://www.alfredah.net/forum/threads/alfredah7077/)

مصافحة أولى .. وإهداء خاص

السلام عليكم
تحية طيبة وكل عام وانتم بخير
بعد إلحاح من الأخ العزيز/أبو ياسر بالمشاركة بهذا الصرح الجميل والذي يحمل إسم نفتخر به وعزيز
على قلوبنا
يسرني ويشرفني الإنضمام كأحد الأعضاء وأرجو أن أكون خفيف الظل وأن أقدم كل مايرتقي بذائقة القرّاء من أعضاء
وزوار
كما يسعدني بهذه المناسبة أن أبتدئ بقصيدة غالية على قلبي والتي قدمتها في الحفل المقام
لشيوخ واعيان قبيلة حرب والذي أقيم مساء الخميس الماضي تحت رعاية أبناء الشيخ إبن
حماد رحمه الله والمتمثل برئيس مركز النقرة الأخ / هادي بن محمد حفظه الله
وهنا أشيد وأتقدم بكلمات الثناء والشكر الجزيل لكل من سعى لإنجاح الحفل وظهورة بهذه
الصورة المشرفة .

جتني الدعوة مساء يوم الخميس ..وجيت ساري=للمكان اللي لو تمره كذا .. يجذبك ضوّه
حفلة ٍ .. من نورها نسريك .. ياليل الغداري=الكرم .. والطيب .. والترحيب .. والقول المفوّه
في محل معزّب ٍ دايم على الجزلات ضاري=لانطق كلمة هلا .. تلقا بها طعم وطروّة
من شيوخ آلاد راشد .. مروية عوج الشباري=كل ماحمي الوطيس .. وناحرت قوة لقوة
جيتكم ياهل الحفل .. من داري .. مسيّر لداري=جيت أسلم .. وأنقل تحية مزبنة الجلوّة
ياسلام الله عليكم .. والتحية جت جباري=إن بغيتوها غلا .. والا بغيتوها حموّة
دام راسي حي .. ويشم الهواء .. والله لماري=في فعايل حرب.. وآسطر من بيوت الفتوة
والله إن راسي يشوش .. ومعلنً حالة طواري=يوم أشوف جموع حرب .. أهل المكارم والمروّة
جمعكم عندي طراة .. وحبكم بالدم جاري=وإلتحام صفوفنا .. يلزم على الشاعر ينوّة
القوافي يوم أخايلها .. تجيني بالمحاري=مزن ٍ يلج رعده في مقدمه .. ويعل نوّة
ينهمل .. لين السيول تسيل .. وتفيض الخباري=والنفل والشيح نبته .. بأول الشعب وعلوّه
فيضة ٍ .. فيها تعل أرواحنا عن كل طاري=لين ماراع العماس يمرها .. ويزين جوّه
لاخليت .. ولاعدمت .. وعل ماأهل العباري=في فراق اللابة اللي تضمني .. وإلها غلوّة
حرب .. ياحرب الدول .. لاثار بارود السواري=كسبكم بالعز راس العز .. ومعانق سموّه
في مواقفكم جبال ٍ صم .. وسباعٍ ضواري=حايشين الطيب من عصر الصحابة والنبوّة
مجدكم نقراه بالتاريخ .. وبكتب البخاري=من قديم الوقت .. حتى وقتنا هذا .. وتوّه
لأنكم سيرة وفا .. وأفعالكم بيض ٍ عواري=تضربون أعظم مثل للجيرة .. وحق الأخوّة
مايضيع المجد والتاريخ له كاتب وقاري=لبسكم عز وفخر .. ماهو من اللبس المموّة
دمتكم ودام البقاء .. والعمر بياع ٍ وشاري=واللقاء حلقة وصل .. ياضامي ٍ بالوصل روّه
رجل ٍ بليا جماعة .. بيت ٍتهبّه ذواري=تلفحه صلف الهبايب في عْشاه وفي غدوّه
والسلام ورحمة الله والتحية جت جباري=إن بغيتوها غلا .. والا بغيتوها حموه
الأكيد إنه من الثنتين لاحقها مواري=يالحزام اللي ذخرته .. عن قسى وقتي .. وسوّة

أخوكم/
محمد بن معتق بن صخيبر الغرابي
26/3/1429