ياقلب لو دمّك من الوقـت محـروق = لاتقول انا مالي على الصبـر طاقـه
لو شب في صدري براكيـن وبـروق = ولو كان طعـم الصبـر مـرٍ مذاقـه
بدرا..زعل من له مشاريه وحقـوق = مـن نايـد الأجنـاب ولاّ الرفـاقـه
وإن جاك ابو وجهين في علم ماثـوق = من شـان حاقـد لاتبيـع الصداقـه
بعض العرب عايش على الشم والذوق = وإن شح كف الوقـت ماسـد فاقـه
الآدمـي مظهـر ومخبـر ومنطـوق = وعن غيـب مكنونـه يدلّـك نطاقـه
والطيب له منهج وله ساس وعروق = والعـود الازرق ميزتـه باحتـراقـه
ولاّ الردي كنّه على الوجه مصفـوق = يبـور بالميقـاف ..خطـو العلاقـه
راس الردي في حبل الأيـام مشنـوق = ولا للردي مـع ذود الأجـواد ناقـه
وترى الكمأ يلقاه من شاف رقـروق = والحسـد داب لـه ملامـس رقاقـه
ولاهو صحيح إن كل مطرود ملحـوق = ولاكـل منهـو صـد قطّـاع ساقـه
كم واحدٍ قلبـه مـن الهـم مفتـوق = وسره عن الحسـاد محكـم وثاقـه
والناس في تفكيرهـا بينهـا فـروق = ويبقـى التشابـه بالإسـم والبطاقـه

صح لسان الشاعر المبدع دائما ابو عبدالاله ومشكور اخوي ابن منيديل على نقل هذه القصيدة ونرجوا ان تتحفنا بجديده
دمت لنا