يازين يازين يازين التعاجيبي=مع كامل الزين بالعشاق لعابه
الله عطاك الجمال وحسن تاديبي=وحورٍ هدبهن يفج القلب بحرابه
من صوبنه تضيع ابه التطابيبي=عكشٍ وقارن بهن هاروت بكتابه
يازين وش مكسب مني بتعذيبي=تجرح جريح الهوى وتدور اطبابه
يازين انا بالهوى محتاج تدريبي=انت اول الحب وانت اتلاه واسابه
بحبي تدلل وطبق بي تجاريبي=القلب بيديك وافعل ماتورابه
يازين لونها بالذل والطيبي=جلبت روس الحمايل فيك طلابه
وابا اقبل اللي يفنون المعازيبي=المال لرضاك والله ماتغالابه
ولو ان للحب واللي يشكي مجيبي=قومت واقعدت كل الناس بطلابه
ولو انها بالمبارز والمكاسيبي=حاربت واجهدت لين احوزك كسابه
انت الخزيزه وراس المال وذهيبي=واليا حصلت انت غيرك ما احسب حسابه
لاشك انا وانت مانعلم عن الغيبي=حتى دعاك النصيب وغصب ترضابه
يازين انا اغليك وادري منت مصخيبي=مار الامل بالشريعة غلقوا بابه
يازين انا اطلبك مطلب قلي مصيبي=تنسى وانا انسى زمانٍ فات عشنابه
وننسى زمان الطفولة واللعابيبي=يوم ارفع البيت وانت تكرب اطنابه
يوم البهم بالضحى يرثع به الذيبي=وانته وانا غافلينٍ نلعب اكعابه
الله يوفقك يازين الرعابيبي=حقك عليه عسى حظك تهنابه
لو صورتك عن خيال القلب ماتغيبي=ماغير اخايل خيالك واتلهابه