الشكر للي وفّقنْ في كفاحي=خمسة عشر عام ٍ مضت صبرْ و جْهاد
الصبر طبعي والتوكل سلاحي=وعزمٍ تبيد اجبال ابانات ما باد
مشروبي المر الهماج الملاحي=وامرّ من الحنظل طعامي من الزاد
ياما على العسره نعض اللواحي=صبرٍ بلغ عض الاباهم والانجاد
صبر الرجال اللي تريد الفلاحي=ماهم مساكينٍ على الغبن رقّاد
في غبنها مثل الحبار المداحي=وتجيب مثله لاتغيًر ولا زاد
صبر ٍ دعا حالي كما العود ماحي=فضلة حديدٍ بين مبرد و حداد
سمٍ على كبدي شرابه لحاحي=صبري على مر الليالي والانكاد
وقلبي عليل الصبر ينزف جراحي=تنزف جراحه والهواجيس تزداد
هنّيت قلبٍ دالهٍ واستراحي=يلهى النهار ويمضي الليل برقاد
ماهوب مثلي كل ما جا الرواحي=لي مع هموم الليل وقت وميعاد
تواردنّه مثل زرق الرماحي=ذالّلي مصاديرٍ وذالّليك وراد
ارعى نجوم الليل حتى الصباحي=نومي ملل واقضيه صبر وتجلاّد
والصبح مع طرْقٍ وساع النواحي=طرقٍ بعيدات مراميس واجداد
طرقٍ على الخايب بعاد المشاحي =عسرات سهلاتٍ على اخيار الاولاد
وساعات طبعي بالغياء والمزاحي=وساعات عاقلْ لهل الغيّ نقّاد
وساعات مجنونٍ وساعات صاحي = خصٍ اليا صار العرب جنّها عناد
وساعات افضّل راحتي وإرتياحي=وساعات افضّل عسر الايام و جهاد
ماني بعاكس مع هبوب الرياحي=اطيع تيار الزمن وين ما راد
والشكر لله كل ما صار راحي=تبدلت غبر الليالي بالاسعاد