راكب اللي كان في ليل والا في نهار =قاطع ٍ طول المسافات في وقت ٍ قصير
غير مكّوك الفضا ذاك.. ذا مكّوك قار=مامعه بين المسارات بالممشى خشير
بالنهار الخـط لو هو مـراقب بالرادار=من سمع من شاف بلّغ على لون وصفير
وان سرى بالليل الاظلم شعق نوره ونار=مثل برق ٍ لا اظلم الليل للبيدا ينير
للمرايا فيه للضّو عكس ٍ وإنكسار= مثل عكس الماء لنور القمر فوق الغدير
لامشى والخط قدمه سنود ٍ وانحدار= كانّه الهودج اليا شدّ في ظهر البعير
من قزوزه للشكامين نيران وشرار= للمراوح بالمكينه شهيق بلا زفير
منوة اللي عايف ٍ دار مشتاق ٍ لدار= عون من فارق عشيره على وصل العشير
داخليّه صالة ٍ خاصّه بوسط المطار= ينعقد فيها إجتماع الوزير امع الوزير
ماش مع كثر الازرّه لبيبانه زرار= غير بصمه بالبطاقة وبصمه شفت قير
وشاشة ٍ في داخليه لتحديد المسار= كنها تقول ادهن السير حتى انه يسير
صمموه عيال الالمان للروس الكبار= وله مع ارقى مجتمع شعب جمهور ٍ غفير
إن نطحته كنه الحوت في عمق البحار=والاّ داب ٍ واقف ٍ له على طيات بير
وان عرض لك كنه السيل بالوادي عيار = السحب ضفت علوّه وجا للماء هدير
لمعة جنوطه ليا مر في وسط الاطار = كنها الالماس داخل قماش ٍ مستدير
وآخر اوصافه بالابيات مدري كيف صار= لو دروا عنْه اكثر الناس قالوا مايصير
وارد الالمان بي أم هو المستشار= وان تحضنت الدركسون مابي لي شوير
ما الوم اللي جمع قيمته ثم استخار= الاّ الوم اللي يبيعه اذا مايستخير
ومن زعل من كلمة الحق قدامه جدار= ومن رضي في كلمة الحق فالدنيا بخير