الله يفكّك يارشيد بن ساير = من شر صدفات الامور الخطيره
في جاه من يعلم خفي السراير = اللي عقل ليعقوب قرة نظيره
يوسف عقب ماغاب جته البشاير = فضل ٍ من الله جاه عجل ٍ بشيره
رشيد زبن اللي به الوقت جاير = زبن الضعيف اللي حباله قصيره
كم واحد ٍ ينصاه محرج وزاير = وصارت له اوسع من نواح الجزيره
شال الحمول المعجزات الكباير = ويشيل حمل اللي برك به بعيره
يكفل ويعطي من حلاله براير = وريف الضيوف اليا لفوا من مسيره
حسناه تاقا سيّته بالعثاير = ويكرم خويّه والضيوف وقصيره
يمناه تبذل ماتهيب الخساير = هدّاج مضمون الروي من غزيره
ان سال وان ماسال ورده جراير = ولاينعرف وردْ القليب وصديره
لعلها خضراً بوجهه سفاير = في جاه من يعلم خفي السريره
لو راح كسره ماتضفه جباير = له فرجة ٍ بين الجماعه كبيره
ياعل يبقى للحمايل بذاير = من يفعل المعروف ربي يجيره
وصلّوا عدد ماراح للبيت زاير = على النبي عد النجوم الشهيره