يالله تجعلني على القول ماجور=وياعل قصدي ماتخالف رواته
وعساه ييدني من الناس جمهور=ليه على بعض الامور التفاته
بين معزة من تعزه على الفور =والبر خيره عاجله هو حلاته
اعلن وفاه وخل صاحبك مسرور=ماينفع التمجيد ساعة وفاته
سلام من دافع وفأيه لمنصور=تحية مني لمنصور ذاته
يستاهل التمجيد ضابط ودكتور=قليل من مثله يسوي سواته
في كل علمٍ يرفع الرأس مذكور=وعن زلة الصاحب طويلٍ اسكاته
وفي طاعة الرحمن منهي ومأمور=وجهه يشع بنور سيما صلاته
العلم والتخطيط والعمر له دور=رحلة قطارٍ من بغى النوم فاته
ياسامعٍ ماأقول تابع ومشكور=عساك ماتلقى عليه شماته
ان جاز لك والا ترى ماأنت مجبور=كلن معه عقله وعينه مرأته
وان كان ماقلته خطا عطني الشور =خذ الدليل من المصادر وهاته
حنا عيال آدم على تسعة شهور=والكل منا يختلف في صفاته
والعلم عند القلب والجسم ديكور=وكلن تبين لك برامج قناته
خطوا الولد يمشي حياته بحادور=معممٍ بين المراكز ثباته
تلقى ملفه فيه عشرين خابور=ومتى من العشرين يثبت براته
وخطوا الولد ضمن الغنادير مستور=سبحان ربٍ فارقه من خواته
اليا حضر بالمجتمع ماله حضور=ياعل ماترجع لمحفوظ شاته
وارجع على نقالة الحكي بالزور=عسى شجرهم مايكمل نباته
ياعلهم خبزة يماني بتنور=اللي نسيها يوم خزن بقاته
ويالله ياجابر عزا كل مكسور=ياجاعلٍ ذا النون يسمع اصواته
يامهلكٍ فرعون في يوم عاشور=يدور به موج البحر مع طغاته
ياواحدٍ ناديت من جانب الطور =موسى عقب مدين وقصة حياته
ياللي فرجت ل(لوط) من زمرة الجور=قدم فدى من دون ضيفه بناته
ونادوه بالنجدة بعد كان مقهور =وبقى بلدهم عبرةٍ من شتاته
تجبر عزانا يوم ندخل مع السور =اليا ودع الراحل و خذت عباته
احدٍ يقدم له بكارى من الحور =واحدٍ عن التعبير تابس شفاته
تم الكلام و لو حصل مني قصور =ماني مثل لقمان تحفظ وصاته
مثأيل صفيتهم صف طابور =يفهمهن اللي ما غرق في سباته
اخاطب العقّال وابعد عن الثور =اترك طريقه سارحٍ في فلاته
و من ضيع اليمة و حول من الكور =يلقى مثل ما قيل قالب حصاته
وصلوا على اللي سيرته كلها نور=اعز مبعوثٍ مع الله انصاته
المصطفى اللي خصه الله بدستور =الدين سيفه و القناعه غناته

الشاعر :شريف ابن راكب