مجالس الفرده

مجالس الفرده (http://www.alfredah.net/forum/)
-   مجلس الشعر الخاص (http://www.alfredah.net/forum/alfredah33/)
-   -   هــــل الــــطــــولات . . . (http://www.alfredah.net/forum/threads/alfredah4065/)

مقبل بن نمران 31-07-07 10:19 AM

هــــل الــــطــــولات . . .
 
بناء على طلب الأخ العزيز ذخر النشاما / منصور الوسوس


.
مبداي بالله عد نبت أشجارها = الخالق اللي عالمٍ بأسرارها
حيثنه المعبود رب البريه = سبحانه المعطي وكاف أشرارها
بالله يالمرسول وصل سلامي = للديرة اللي ماجفت خطارها
وصل سلامي للجماعه ربعي = كم شيخ قومٍ لحفوه غبارها
أفعالهم كما البدر ليلة الدجاء = ليا ولعت رؤس الفتائل نارها
لهم ماقفٍ مثل الجبال الراسية = عز الضعيف كبارها وصغارها
يوم الفراوي شاف غدر الدنيا = جاهم وكلٍ قام جاب خيارها
ثم قال يمدح شيخنا ضيف الله = عقيد قوم وماكرٍ لأحرارها
حلوين للعاني ليا جاء جنابهم = يسقون المعادي باللقاء أمرارها
مايشربون إلا قراحٍ صافي = يوم غيرهم يشرب هماج أبيارها
إنشد وتلقاء فعل ربعي بين = ويكفيك عن ذكر الفعول أخبارها
ربعي هل الطولات وأنا أفخر بهم = وديارهم يشهد لها من زارها
وكل القبائل فيهم الطيب والوفاء = ‍ مأغط حق اللي تشب شعارها
وخير الكلام اللي يقل ويدلنا = وليا كثرت السلعه تقل أسعارها

.
12 / 3 / 1418هـ

خلف الفريد 31-07-07 01:57 PM

رد: هــــل الــــطــــولات . . .
 
بسم الله

الدرّه اللي كل حرٍ زارها= وكحّل عيونه من جميل ازهارها
من طيبها والطيّب الي قالها=مدّت يديها تحتضن زوارها
من غير مقبل للمعان المحكمه=باعه طويل وسابرٍ لاغوارها
اللي عزومه ماتلّينها الصعاب =لو سكّرت بيبانها واسوارها
من عادته قول الجزيل وهمّته=همة حكيم ٍلاكتشاف اسرارها
ليا مدح ربعه تحس بغيرته=كنّه يتل من الضمير اشعارها
ولا هو يفرّق بالتعامل والوفا=اصغار ربعه يعدلون كبارها
ولا هي غريبه منك يانبع الفخر=نمران بن حماد راس خيارها
واسلم وتسلم لي دليل ٍللعلا=مثل النجوم الي تدلّ انوارها


مجرد حجز ولم يكن فاخراً كما اردت!!!!!

مشعل الجضعان 31-07-07 02:28 PM

رد: هــــل الــــطــــولات . . .
 
صح لسانك




وبيض الله وجهك


وكل بنيخيك يبون قصيدك

مشعل الفريدي 31-07-07 04:14 PM

رد: هــــل الــــطــــولات . . .
 
صح لسانك وعلى شأنك

ماجد المطيع 31-07-07 08:49 PM

رد: هــــل الــــطــــولات . . .
 
صــــــح الله السانـــك
ومافيـــــــــــــك حيلة يابن نمـران

غازي الفريدي 31-07-07 08:54 PM

رد: هــــل الــــطــــولات . . .
 
بيض الله وجهك يامقبل على هذه القصيدة التي تجمع مابين صفاةٍ من صفاة الله

جلة قدرته . وسلام . وذكر الحقايق :


إنشد وتلقاء فعـل ربعـي بيـن
ويكفيك عن ذكر الفعول أخبارهـا

ابن منيديل 31-07-07 09:23 PM

رد: هــــل الــــطــــولات . . .
 
اخي / ابو ياسر ( عقيد القصيد )

سبقني بالحجز الفاخر ابو محمد ومن سبق لبق

لكن مااقول الا صح لسانك يامبدع ويامطوع القاف والوزن


مبداي بالله عد نبـت أشجارهـا = الخالق اللـي عالـمٍ بأسرارهـا

بداية طيبة
بداية فيها ذكر للخالق عزوجل


وصل سلامي للجماعـه ربعـي = كم شيخ قـومٍ لحفـوه غبارهـا

وصل سلامك ياسعادة العقيد من خلال هذا المنبر


لهم ماقفٍ مثل الجبـال الراسيـة = عز الضعيف كبارهـا وصغارهـا


كفو ، كفو ربعي وهذي عوائدهم وماهي بغريبه عليهم

والشكر للوفي الذي يمجد تاريخ ربعه



ربعي هل الطولات وأنا أفتخر بهم = وديارهم يشهد لها مـن زارهـا


وحنا نفتخر بك يابو ياسر وانت منهم ولك طولات تسجل بماء الذهب


وخير الكلام اللـي يقـل ويدلنـا = وليا كثرت السلعه تقل أسعارهـا


(( خير الكلام ماقل ودل صحيح لكن انت مانبيك تقل بدررك ابدآ ومعك انت ننسى هذه الحكمة ))


لفت نظري تاريخ القصيدة

قصيدة لها تقريبآ 12 عام وتاركها حبيسة بالادراج ! !

مافية الا اننا نداهمك ايها العقيد ونفك الاسير من قصائدك واللتي تستنجد بنا لنخرجها

ابو ياسر تقبل مروري البسيط ايها الشاعر الجزل

والحجز الفاخر المره هذي استولى علية ابو محمد



تقبل جزيل الشكر لك ولأخي منصور الوسوس الذي اخرج هذه القصيدة الاسيرة

محمدسعودالفريدي 31-07-07 09:53 PM

رد: هــــل الــــطــــولات . . .
 
أبو ياسر

صح لسانك وبيض الله وجهك






ربعي هل الطولات وأنا أفتخر بهم


وديارهم يشهد لها مـن زارهـا






وحنا ربعك ونفتخر بك سلمت يمناك يابوياسر

ابن جدعاء 01-08-07 02:16 AM

رد: هــــل الــــطــــولات . . .
 
مقبل ابن نمران

كل قصيده هي اروئع من سابقتها
وخصوصاً عند مدحك لربعك عيال راشد

ماقول الا الله يبيض وجهك

ونريد المزيد من روائع الشعر ...

البارق 01-08-07 08:17 PM

رد: هــــل الــــطــــولات . . .
 
مقبل بن نمران الشاعر المبدع

قصيدة رائعة جدا جمعت فيها بين الابداع اللفضي

وذكر محاسن ربعك عيال العود


نتج عن ذلك مقطوعة ادبية بريح الكادي


لتزهو بها مجالس عيال راشد


مقام الشكر بحقك قليل


ولكن ما اقول الا دمت لنا وسلم راسك يبن نمران


والشكر موصول للوسوس لهذا الطلب الجميل


الساعة الآن 05:41 PM

Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO TranZ By Almuhajir

Ads Management Version 3.0.1 by Saeed Al-Atwi

لتصفح الموقع بشكل جيد الرجاء استخدام الإصدارات الاخيرة من متصفحات IE, FireFox, Chrome

Security team

vEhdaa 1.1 by NLP ©2009


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52