لجل المكان اللي حوى علية القوم=ولجل المقام اللي على صدري وشاح
ابا تخير سلكٍ اصلي ومبروم =انظم به ابياتٍ كما نظم مسباح
ابيات شعرٍ مابها ضعف وثلوم=وليا اجتهدت اجلس وانا البال مرتاح
نقيتهن لعيون حرً ومحشوم=ياكثر هداته ليا قيل ..شلاح !!
اليا شهر من ماكره يبعد الحوم= وصيده من الجزلات مايجيبها سلاح
ابو فراس وفخرنا فيه محسوم=وله سيرةٍ يفرح بها كل مداح
لو حط فوق المتن تيجان ونجوم=ماحط دون العلم ...ضبة ومفتاح
طبَق حديثٍ للمسلمين معلوم=ولاحسبها بالخساير والارباح
جاب الشهادة لاعدمناه زيزوم=ماراح للمشرق ..زيارة وسواح
كم ليلةٍ ماذاق فيها طعم نوم=وحصيله الليلة ..تباريك وافراح
رباه شيخ دوم مايلحقه لوم=على الرجوله والمعزة والانصاح
الدين عنده كوم والمرجله كوم=والبيت مبني على طيب واصلاح
وختامها صلوا على خير معصوم=عد النجوم وعد مابارقٍ...لاح