سلام تسليمٍ بها الطيب عطر=اسوقها حشمه على كل غالي
جزله وباطنها من العود بخر=على مسامع من يعشق المعالي
لجل اخبر اللي مابعد جاه مخبر=قبل يلم من الردى والخمالي
لراعي الغفلات قبل يتحسر=ويصبح رصيده بآخر العمر خالي
المرجله عسره على من تقصر=اللي على الكايد يصيبه جفالي
لاصار ماجودْ على الاض مخطر=يبين كسر البيت فيه الهزالي
وان كان لاشفت الشواهيق تحذر=ماظن ترقى فوق روس الجبالي
تبقى على السهله سوات المخدر=ان جيت والا رحت مالك مجالي
ولو زدت بالاعذار ما انته معذر=ولانته بلاقي من هروجك قبالي
اضرب على الكايد لا لاتشطر=ومن الفشل والخوف اصحى تبالي
المرجله قدمك إليا قمت تعبر=بين الدروب المفحمات الطوالي
وكل الكلام الزين باللوح سطر= ويبقى لك التقدير بين الرجالي
واذهن تسولف في فعولك تجهر=وياضح عليك النقص والاختلالي
وافطن ترى قبل الحلا علقمٍ مر=وتقعدك بقعاء فتره من الليالي
خلك ثقيل ولاتسرع تعثر=وبسياستك ينحل عقد الحبالي
وقريبك اليا زل اذهن تكشر=ترى بعدها لكل شر احتمالي
لأبن زويبن قاف يبقى معمر=لزلة قريبك خل صدرك شمالي
وبالواجبه اصحى تغيب وتعذر=خوفاً يتمم لك ويقل الحلالي
وبالمال ما اظنك من الصرف تخسر=لاصار صرفه بالكرم والدّلالي
دلال بن وهيل فيها مبهر=كيفٍ تنومس به رجالٍ عوالي
على مركابٍ تحته السمر جمر=تعيش جواً مايجي بالخيالي
وعندك رجالٍ لصعيبات تجسر=ماهمهم قولة وش يصير تالي
افعالهم دايم مع الناس تذكر=وعاداتهم شيل الحمول الثقالي
وختامها عش التواضع وتعبر=من زاد بالتدقيق جاه الهبالي
واطنخ حياتك لاتضيق وتكدر=العمر في ومقتفيه الزوالي
وصلاة ربي عد ماهل وامطر=على نبياً ذاع دينه كمالي