البارحه عن لذة النوم لجلجت
=يالله عسى خيرن تعكر مزاجي

حاولت مدري كيف وشلون عالجت=عالجت وضعي مايفيد العلاجي

وأثره طرالي سجت الرجل لاسجت=يم الشمال اللي هواها مزاجي

من فوق جمسن يطرب البال لادجت=صنع اليهود ملقبين الخواجي

وياما حلا بعصير لاصار دوجت
=وعقب الآثر بالعين روغ اوماجي

وعلى يمينك مسرول الساق لابلجت=طلعه ركاد اولا يجي به رجاجي

سون على اللي ساوقت لاتفرجت
=لاتقول راحت لو عليكم عجاجي

بإذن الولي لوهي ورى الحزم مااحتجت=ما احتجت فزعت واحدن لك ايناجي

وصفت ادلالن بالحطب نارها اسرجت=والقدر يطبخ به صغير النعاجي

ولاجازلك موقع بالأقمار برمجت
=متى انتويت الله عليه الخراجي

عز الله أنك عن غثاء المدن عالجت
=قلبك وجسمك عن اصحون الدجاجي

حيثن كبت النفس بالمدن وأحرجت
=وكم واحدن له غايتن وإبتهاجي

وعن خوت الأنذال مبطي تخارجت
=وعطيت نفسي مع اوساع الزراجي

او عز الله إني اشتقت للبر واخلجت
=والله يعين اللي طواه الخلاجي

ومن جامعة غبر الليالي تخرجت=وعرفت صافي حلوها والهماجي

الشاعر / (ابوفايز)
عبدالله سمير العوما الفريدي