مجالس الفرده - قصيدة الشاعر عيسى عبدالله الفريدي في احتفال اهالي المخرم

السلام عليكم عليكم ورحمة الله وبركاته

تحيه من القلب صادقه لرواد واعضاء مجالس الفرده الافاضل

للقبيله حقاً علينا ان نقدم لها كل مالدينا ونشاركهم بأحتفالاتهم فهم عودونا على

(( التكاتف والتلاحم بين ابناء القبيله ))

وضعو لهم اجتماع في ثاني الاعياد منذ اعواماً قديمه فأستمرو كل عام في تطور فشكراً للقائمين عليه

عملو وكافحو لإرضاء الجميع ونجاح اجتماع القبيله فلهم منا جزيل الشكر والامتنان

وبهذه المناسبه شاركت بأبيات متواضعه
_________________

بسمي واسم ربعي هل العز والقود=يامرحبا ترحيب عالي مقامه
يامرحبا واعداد ماذعذع النود=واعداد من كبر وتمم صيامه
عيد الجماعه ثاني العيد موعود=بجمع الجماعه موعد بكل عامه
اصل التواصل هو هدفنا له عهود=في ثاني الاعياد بان اهتمامه
وجمع الجماعه كل عام وله جهود=من الرجال اهل الكرم والشهامه
وتراثنا في حفلنا اليوم موجود=رمز التكاتف والتلاحم وسامه
وميدان خيل للاصيلات ممدود=من حرها ماتنتظر للعلامه
ياما كسبناها بشلفا وبارود=يوم المعادي مايعيش بسلامه
وحنا كسبنا العز والطيب والجود=من عصرنا الاول ليوم القيامه
متوارثينه من مطاليق وجدود=ساس الوفا والطيب عز وكرامه
وحنا فعلنا الطيب والطيب مشهود=يشهد لنا اللي صادقاً في كلامه
ويشهد لنا سيفاً من الوقت مجرود=قوماً لنا بالمجد ذروة سنامه
وحنا وصلنا قمة المجد بجهود=بأرجالنا اللي يحتمون الجهامه
مخارشه يوم الليالي غدن سود=اهل الوفاء متوارثين الزعامه
سقم العدا والعلم واضح وماكود=افعالهم تعرف على كل هامه
فعلاً على البرهان للناس معدود=يفخر به اللي شامخاً في مقامه
خصيمنا خسران ضامي وملهود=ويوم اللقا ترفع لنا كل هامه
اقول قولاً مايجي فيه منقود=والذرب يفرض كلمته واحترامه
وباسمي واسم ربعي هل العز والقود=يامرحبا ترحيب عالي مقامه

____________________

الشاعر : عيسى عبدالله بن حميّر الفريدي