اجمل تحيه على من كان يسمعنا=للي حضر حفلة التكريم منقوله
حيى الله الفارس اللي فعله اقنعنا=على الكريم اعتمد باسباب مبذوله
ندري ونطمح ومن مثله توقعنا=يحط له منزله ماكان منزوله
تدرون منهو بهذا المدح من يعنا=عبدالله اللي به الامال ماموله
بعض المواقف تشجعنا وتدفعنا=تفرض علينا الكلام الزين ونقوله
والله ماجيب العلوم اللي بلا معنا=مالي هدف من دوا جمعه وشوله
الله على العز بأمر الدين يجمعنا=ويزود الحب بين الشعب والدوله
وعن سيرة الغدر يحمينا ويمنعنا=ويعيذنا من دعاة الشر وفلوله
عسى جميع العواصف ماتزعزعنا=اللي تهاوت بها بلدان مشلوله
يزتنا اليوم من بالغد يقمعنا=ويلطف الجو باشياء غير معقوله
يضيق كل الفضاء اللي كان ياسعنا=ونلقى الكرامه بدون اسباب مقتوله
حنا عرفنا وشفنا من يخادعنا=يرسم لنا خطة التضليل بسهوله
ياغلى وطن ماشرينا بك ولابعنا =ياجب علينا الدفاع بقدر منطوله
نفوسنا للخديعه ماتطاوعنا=على الوفاء للوطن والدين مجبوله
وحنا على قمة العلياء تربعنا=نمشي بنور(ن) يشع لكل من حوله
سلاحنا الدين والقران مرجعنا=وارزاقنا من جليل الملك مكفوله
ونعود لاهل العقول اليا تنازعنا=ونلقى المشاكل بكتب الدين محلوله
الحاصل انّا ليا طعنا الهواء ضعنا=تفرع الطرق والاهداف مجهوله
الهون ينزل بنا والدين يرفعنا=ومن لايحاول مقام العز ماينوله
وماظن لو صار قولت ليت تنفعنا=ليا طاف وقت الدواء مافاد مفعوله
ياهوننا للمعادي لاتوزعنا=واليا اجتمعنا كسبنا الفوز بالجوله