مجالس الفرده - قصيدة الشاعر سعد بن عبدالله بن ناشر في حفل فرج بن فخري الفريدي

هذه القصيدة للشاعر / سعد بن عبدالله بن ناشر في حفل فرج بن فخري الفريدي
في أم رقيبة 1434/2/1 هـ

وقفة وفاء

بالمـوقـف اللي ما لنا عنـه صدّات = الواجبـــة ناقـــف لهـــا ونحـمــاهـــا
وقفة وفاء ما هي بوقفـة دعايــات = وقــفــة رفـيــــق مـا يــــدوّر وراهــــا
عليـه من ربعـه ليا غـاب شرهــات = الله يجـــمـلنــا ونكـســب رضــاهـــا
وياللي تبـثـون الخـبـر بالقـنـــوات = إليكــم النـشـــرة وبثــــوا صــداهــــا
وملخص الموجز وجـزل العبــــارات = قام يتسـابق مـن هجـوسي نباهـا
عـن نخـبـة بكــارٍ خيــارٍ عـريبـــات = يتعــب قـليــل المـرجـلة مـا قنـــاها
حمرٍ وبرهــا مثل لـون الجـنيهــات = وإلا شعاع الشمس لا أقبل مساها
دهم المناكب والمقادم مضيحـات = حمسة قهوة ما انجضت من نيــاها
الفــاخــرات الراهيــات الـجــلالات = فهــق الشعــاف اللي طويـل قراهـا
حمر النعم توخذ بحـمــر الريـــالات = لله در اللـي بـمـــالـه شـــــراهــــــا
وهــويّة المــالـك لها رمــز واثبـــات = زناد كســاب الجـميـــل اعتـــلاهـــا
فرج من اسمه للفــرج فيـه ميـزات = كفـــه نديّه والعطـــا من عطــاهــــا
فرج لمن ضـاقت عليه الوسـيعــات = له حاجـــة ما احد قدر له قضـــاهـا
دمث الجناب ويفعل الطيب بسكات = واليـــا فعلــها ما تحـــرى ثنــاهـــا
من لابــة لا جـا ازدحــام البـطــولات = يبقـى علمها شامخ في سماها
نطــاحة الكـــايد زحـــول الثـقيـــلات = أولاد راشــد مجــدها من بنــاهــا
وبيوتهم مثـل الحصــون المنيـعـــات = يذري ذراهــا من لجــا في ذراهــا
من غيــر قاصــر في رجــال المـروات = النـاس دون حقـوقهــا وتحمــاهــا
وتم الـكــلام اللي بجــزل العـبـــارات = عن نخبــة راس الهـرم مستواها

وسلامتكم