الموت مندوبٍ حضوره امفاجاه=ومهمته مادونها يحول حامي
دايم معازيبه هم اوّل ضحاياه=ومع قوّ ضرباته ينال احترامي
والعبد صبره واحتسابه لمولاه=ولا ينفعه كثر الجزع والكلامي
والمسلم المومن يقينه ومبداه=نورٍ يبدّد حالكات الظلامي
ويالله تـثبـّت قلب مفلح وترعاه=بعيونك اللي دايمٍ ماتنامي
وتربط على قلب أمّ غالٍ فقدناه=وما تشتكي بالكبد برد وسلامي
وتنزل على بيته سكينه وتحماه=وتبدّل الغمّه بوبل الغمامي
مانملك الا قول ياالله ياالله=تعُـوْضهم وتحلّ يارب سامي
وتعوّضه زهرة شبابه بدنياه=بالعفو والاحسان عند الزحامي
وان راح سامي يبن عمي قفيناه=ماخلّد محمد شفيع الانامي
ياما فقدنا من حبيب وسليناه=يخفّف النسيان بعض الهيامي
وعسى عوضكم يوم سامي خسرناه=يحفظ لكم باق الحرار الحشامي
والحمد لله يوم علمٍ سمعناه=هوّن مصابٍ بالحشا له ضرامي
من غسّله يوم ابتدا به وسجـّاه=قال ابشروا ياهل الفقيد الكرامي
سبـّابته مرفوعةٍ وسط يمناه=متشهـّدٍ .. والوجه بدر التمامي
توفيق من ربٍّ جزالٍ عطاياه=وهذا دليل فيه حسن الختامي
وصلاة ربي عد مزنٍ نثر ماه=على النبي الهاشمي والسلامي

الله يرحمه ويصبر والديه واخوته وذويه
وجزاك الله خير على التعزيه في الابيات الشعرية
ولانستغرب منك الوفاء ومشاركة الجميع اذا كان في حزنهم تواسيهم ..واذا كانت في الافراح وجدنا لك الشيء الجميل
تقبل مرروي لك