مجالس الفرده

مجالس الفرده (http://www.alfredah.net/forum/)
-   مجلس الشعر الخاص (http://www.alfredah.net/forum/alfredah33/)
-   -   بضيافة الوساوسه .... (http://www.alfredah.net/forum/threads/alfredah38192/)

خلف الفريد 25-08-12 11:06 PM

بضيافة الوساوسه ....
 
ايها الاحبة
مساء الخير
ثاني ايام العيد مساء كان لي شرف مشاركة اخوالي الوساوسه احتفالهم المبارك بدعوة
كريمة منهم وهو الاحتفال السادس عشر على التوالي ، ادام الله افراحهم وسعادتهم ،
وكان كما رأيتم بالتغطية حفل مهيب وكبير هالني فيه عظمة رجاله ووفائهم لبعض
وكرمهم الكبير ووضوح جهود القائمين عليه وشموخهم وتفانيهم وقد اكرموني بدرع
وهدية اخرى ثمينة جزاهم الله خيرا وقد اهديتهم قصيدتين الاولى بالمناسبه والثانية
ستة عشر بيتا بعدد اجتماعاتهم المباركه المستمرة منذ ستة عشر عاماً:
الاولى :
ياالله يالمعبود خلاق الاكوان=ياسامكٍ عرشه بليا دعامه
بلغتنا شهر المحبه والاحسان=واعنتنا على الصيام وقيامه
عسى تعبنا فيه ماهو بخسران=وان ماكسبنا فيه نرج السلامه
انت الكريم اللي على الخلق منان= ودليلهم عند الحلال وحرامه
واليوم جمعٍ فيه ربعٍ وخلان=اسالك تجمعهم بدار الكرامه
ستة عشر عامٍ وفيين واخوان=ومن غاب منهم ما الحقوه الملامه
شبابهم مشوا على درب شيبان=وشيبانهم طيبه ودين وعتامه
وانا حضرت وقبلها كنت شفقان=مقامكم يفرض عليّ احترامه
واللي دعاني بسمكم طير حوران=منصور ابو يارا كبيرٍ مقامه
ولي الشرف لاهان راسه ولا هان=اسم الخوال اهل الكرم والشهامه
ولاني غريب بداخل القلب برهان=رسمٍ على جدران قلبي علامه
انا ولدكم واحمل الحب عنوان=وانتم على ماقيل ذروة سنامه
وانتم هل المعروف في ماض الازمان=اللي على صدري كبيرٍ وسامه
يوم الليالي تظهر انياب واسنان=حضنتم اللي دوب يفهم كلامه
بظل الحنون ام الجمايل والاحسان=الله يسقيها الرحيق بختامه
ويكتب لها الرحمن عفوٍ وغفران=يوم السؤال اللي كثيرٍ زحامه
أمٍّ عليها القلب هايم وولهان=ولاحل طاريها تزايد هيامه
واللي يراعينا سلايل كحيلان=حرٍّ جمع بين الفخر والزعامه
خال السعد زيزوم ذربين الايمان=لعل رش المزن يسقي عظامه
وختامها صلوا على نسل عدنان=شفيع الامه يوم عرض القيامه
الصادق المبعوث في خير الاديان=افضل نبيينه وصفوة انامه
-------

***********
الثانية :

اليوم عيد وصدر الاحبـاب مشـــروح = يارب لاتضيــّق لــهم فيـــه صـدرا
وسلام تســــليمٍ من القلب والــــروح = ماخالطه غير الوفا.. وانـــــتم ادرا
على الخوال اللي من خيار مســروح = ونورٍ يبــــدّد لاظهر كل غــــــدرا
ربعٍ مشاعرهم تكفي عن البـــــــــوح = واليا مشوا بالطيب ماهـو تســـدرا
اهل الوفا لاصار للضــايقة فـــــــوح = يوم الحساني ماضي الوقت نـــدرا
كم دعوةٍ جتني وانا قلت مـــــــاروح = الا لــمكانٍ لــه محــبه وقـــــــــدرا
واللي دعاني باسمكم مبعد الشــــوح= منصور قدره فوق ماهو بحـــــدرا
حرٍّ مقامه غير والقلب مفــــــــــتوح = ولا ضاعت جهوده مع الطيب هدرا
وانا ولدكم بين مادح وممــــــــــدوح= وارفع لكم بــيضاً على كل جـــــدرا
طلعت للدنــــيا هلالٍ بلا ضـــــــــــوح= وانتم حضنتوني لما صرت بـــــدرا
لو كنت حمداوي.. شهاده لمجــــروح= شرابهم صـــافي والاضـداد كــــدرا
والا البشير اللي بهم كل طحطــــــوح= خطل اليـمان اليــــا هبـا كل ودرا
ولو كنت عماشي ترى الشك مطـروح = خصيمهم يشبع مهونه وســـــــدرا
ولو صرت حواسي جبل ساق مايزوح= ومرٍّ على كـبد المعـــــادي وفــدرا
والا الغصيّب واسمهم مابه مــــــزوح = ولا احدٍ حكى عنهم قطاعه وغـدرا
الجد عيد ومن ورا عيد مســــــــروح= والوسوس اسمٍ له مــــهابه وقـدرا



ابنكم المحب
خلف بن محمد بن عتاق الفريد

الفريدي 25-08-12 11:28 PM

رد: بضيافة الوساوسه ....
 
صح اللسانك يابو عبد العزيز

ويستاهلون خوالي كل خير وعلمهم غانم وحفلهم من نجاح إلى نجاح الله يوفقهم لكل خير


فهد الطميشاء 25-08-12 11:44 PM

رد: بضيافة الوساوسه ....
 
صح لسانك يا أبو عبدالعزيز .. وافية من راس وافي

ونعم والله بالوساوسة ولا يهنون بقيّة أبناء العم .. وبارك الله بأبو يارا ودعوته لك

اللي خلانا نستمتع بهذه الروائع

منصور الوسوس 25-08-12 11:51 PM

رد: بضيافة الوساوسه ....
 
عندليب المجالس
ابا عبدالعزيز
كانت ليلة جميلة وزاد جمالها حضوركم الزاهي امتعت الحضور
بطلتك الغالية وابداعك الخطابي فضلاً كما قلته من ابيات جميلة
أخي ابا عبدالعزيز انها ليلة وفاء لشخص يستحق الوفاء
اكرمتنا بحضورك واستجابة رغم معرفتي الشخصية بالمناسبات
التي اجلتها واعتذرت عنها وهي دليل على ما تتحلى به من
وفاء لأخوالك لك مني ومن الجميع كل الشكر والتقدير
مقرونا بخالص الدعاء بالتوفيق وصلاح النية والذرية

عبدالله حمد الفريدي 26-08-12 12:07 AM

رد: بضيافة الوساوسه ....
 
الشاعر الكبير الوفي القدير
خلف بن محمد بن عتاق الفريد
انت وفيت مع القبيله كلها ولايستغرب منك الوفاء
خوالك يستاهلون الوفاء حفلهم شرّف القبيله كلها عساهم على القوه
والله يجمعهم على العز والمعزه ويديم عليهم هذه اللحمه والتكاتف الجميل
ابو عبدالعزيز صح لسانك على كل بيت مليون مره والبسك ربي تاج العافيه
تستاهل التكريم وحبة راس وخشم .. الحفل كان مهيب وزته هيبه لاعدمناك

علي الجضعان 26-08-12 02:00 AM

رد: بضيافة الوساوسه ....
 
صح لسانك يا أبو عبدالعزيز .. وافية من راس وافي

ونعم والله بالوساوسة ولا يهنون بقيّة أبناء العم معايده بماء الذهب


الف شكر على الاضافه




غازى بن عجاب أبوزوايد 26-08-12 04:07 AM

رد: بضيافة الوساوسه ....
 
اخوي الكبيربقدره
خلف بن عتاق الفريد
صح لسانك مليون ولاتهون وافي يابو عبدالعزيز
والنعم بخوالك الوساوسه ولايهونون باقي الجماعه قصائد جزله
وجميله كما هي عادتك دائماً وأبداً أنرت مجلس الشعر
الخاص بها
تحيتي

الجديد 26-08-12 07:08 AM

رد: بضيافة الوساوسه ....
 
عندليب المجالس ابوعبدالعزيز صح لسانك مليون
هكذا التالق , يستاهلون خوالك الوساوسه ولا يهون بقيت الجماعة . تقبل مروري

ابـن مـطـيـع 26-08-12 08:54 AM

رد: بضيافة الوساوسه ....
 
الـجـد عـيـد ومــن ورا عـيــد مـســروح =والـوسـوس اســمٍ لـــه مـهـابـه وقـــدرا

انا اشهد انك صادق . ومليون نعم بالوساوسه ونعم مليون فيك يا عندليب المجالس. 
قصائدك تستاهل الاقتباس جميعاً 
ولكن هذا البيت سيبقى مخلداً .....
بيض الله وجهك  تستاهل التكريم،،،
الكرم يأتي من اهل الكرام  

وهذا دليل الوفاء منك ..
قصائدك تمتاز عن الغير في ذكر الامجاد 
وتاريخهم المجيد. ....
لهم شرف دعوتك ،، ولك شرف التواجد 
هكذا تفعل الرجال شرواكم ..
تقبل مروري ومداخلتي المتواضعه هنا 
ادآم الله المحبه بينكم 

أبو وسيم 26-08-12 09:25 AM

رد: بضيافة الوساوسه ....
 
صح لسانك ابو عبدالعزيز

والنعم بالوساسه ولايهنون بقية عيال راشد

وهذه عوايدك وافي دائما لربعك

وكل عام وانت بخير


الساعة الآن 12:42 AM

Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO TranZ By Almuhajir

Ads Management Version 3.0.1 by Saeed Al-Atwi

لتصفح الموقع بشكل جيد الرجاء استخدام الإصدارات الاخيرة من متصفحات IE, FireFox, Chrome

Security team

vEhdaa 1.1 by NLP ©2009


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52