معزي نعمته دامت سلايل =شكرنا الله.. ودامت في بديله

حشا لله ما نرضى بدايل =ولا يرضى الحكم غير بسليله

الا يا حي من للمجد طايل =مليك العُرب.. قاده تلتجي له

أصيلة.. ما لها غير الأصايل =هل العوجا.. والانساب الأصيله

عيال العود.. مضراب المثايل =صفاته نادراتٍ.. مستحيله

لحكمه.. بايعت كل الحمايل =عزا فجعة فهدنا.. في رحيله

عطا.. ما رد للي جاه سايل =عدا تقبيل يمناه الطويله

ما يرضى.. خضوع شعبه والتمايل =ولو قادة شعوبٍ تنحني له

كعام الضد.. وظلال القبايل =يجور الحمل.. لكن يرتكي له

هموم العرب.. والإسلام شايل =خدم بيتين.. والثالث يخيله

على وضحى النقا.. بيض الفعايل =لا ناش الزند.. صوان الفتيله

مقر العدل.. ما به شيء مايل =عدا عقاله.. شويه فيه ميله

ملك باني عدل.. للظلم زايل =وطن.. ما هو مليكه.. عزتي له

والا يا لله يا منش المخايل =تديم العز.. واليمنى الجزيله

ولي العهد.. لا جات الصمايل =يدوس الراس.. ويزبّن دخيله

ابو خالد.. احبه.. حب هايل =ولا لي فضل احبه من جميله

احبه كثر.. حبه للجمايل =احبه كثر.. حبه للفضيله

احبه كثر.. ما وصول الطوايل =يشوفه ركن.. ونشوفه نفيله

عهد.. ما جال دمي.. فيّ جايل =غلا سلطان.. شيال الثقيله

قسم بالله.. ما انسى له فضايل =ولو تنسى الكنانه.. فضل نيله

رعى الله مهد خاتمة الرسايل =بلاد العز.. وامجادٍ جليله

نخيل الخير.. توحيد.. وصقايل =رموز الحكم.. بالرايه دليله

من معزي.. لأبو متعب دلايل =إجابة ربنا.. دعوة خليله

ليوم الدين.. يا بلاد الأصايل =بعز.. وأمن.. واخصامك ذليله