الحزن له مصدر وللحزن ميراد = في روضةٍ يذبل ورقها غبينه
ويارد على قلبٍ على الحزن وراد = تسبح شرايينه بجمـّة معينه
ويشب به نارٍ تقل نار حداد = أونس لظاها بالضلوع الحصينه
وأحسـّها مع الشرايين تنقاد =يالله عفوك والصبر والسكينه
على حبيبٍ ما للاّماه ميعاد = طوّى عن الدنيا شراع السفينه
مشى طريقٍ من مشى فيه ماعاد = مع ساقة الأجداد ساق الضعينه
اللي يساوي نور عيني والأولاد = اثنا حياته مابحياتي وزينه
يزيد حبه كل مالعمر يزداد = ضنيني المضنون وانا ضنينه
والله يالولا الحي متحول جـماد = ماتفرق الأيام بيني وبينه
مار القضاء ماله اليا حل رداد = وما يكتب الله بالرضا قابلينه
ماني بجازع من مصابي ولا راد = والعين تذرف والخواطر حزينه
فرّشته من الأرض قده بالالحاد = وألحفته بيمناي لبنه وطينه
واقفيت وحر الدمع بعيوني ابداد = والقلب بين الناس بيح كنينه
قبره لعله ينفتح باب من غاد = على جنان الخلد خوخه وتينه
ويمطر عليه اليا اقبل الوسم رعاد= لاجهـّت الديمه تعلـّه غشينه
اول منازل هجرة الحاضر الشاد= يلقى بها من كل تنعيم عينه
وقراره الجنه وتكريم وإسعاد = يالله ياعالم خفايا الضغينه
رحمتك باللي مات مازل ماحاد = عن نهج ابا القاسم وتشريع دينه
صوام ومصلي وقانت وعباد = شباب شايب مصحفه في يمينه

اخوى
الشاعر ابو زياد
رحم الله ميتكم وأسكنه فسيح جناته
وجعل قبره روضه من رياض الجنه
صح لسانك قصيده جزله حزينه معبره تأثرت
منها جداً صح لسانك مره ثانيه ولاهنت
تحيتي

عـلــى حـبـيـبٍ مـــا لـلاّمــاه مـيـعــاد=طـوّى عـن الدنـيـا شــراع السفيـنـه
مشى طريقٍ من مشى فيه ماعـاد=مع ساقـة الأجـداد سـاق الضعينـه