ان كان ربعك ماتقدر جنابك=وإذا رفعت الصوت ما يسمعونك
فرصه تونس خاطر اللي هقابك=طاول على هامتك من كان دونك
انطح كبار القوم واحسب حسابك=واعرف طريقك زين فتح عيونك
واضرب حديد ولاتقدم عتابك=واحذر هل الضحكات لايخدعونك
واستقدم الايام واغنم شبابك=وان قيل صابه جن زود جنونك
واترك بقاع الارض واعشق ترابك=واكتب وصيه وسطها يدفنونك
تاضع على التاريخ بصمة غيابك=وتفهمك ناسٍ كان مايفهمونك
نايف بن مياس

ياللي قطعت البيد نوّخ اركابك=الوقت صيف ويابساتٍ شنونك
لازم تاكد من كفاية زهابك=طرد الحباري واحدٍ من فنونك
دايم ورا الجزلات تومي ثيابك=مانشوفك الا يوم تنقش سنونك
ياراعي المقناص باول شبابك=هديتك للعود ناشف لحونك
لك عزوةٍ لاقلتها يعتزا بك=عيال عودٍ لاحتمت يندبونك
والاسهم اللي حزتها باكتتابك=لاتبيعها لو ربّتوا لك متونك

انا حضيضٍ بين نايف ونواف=اهل البيوت النايفات الفريده
هذا ولد مياس عزّه وميقاف=من لابةٍ بالعود نعم البديده
وهذا حفيد معزّزٍ بين الاسلاف= الشيخ ابن نومان راع القصيده
شيخٍ تشرّف سمعته مثل الاشراف=وقصيدته دايم قديمه جديده
والشعر تعبيرٍ عن احوال واوصاف=يفصح به الشاعر عن اللي يريده
والشعر فتلٍ بين ناقض وعرّاف=وتبقى الظنون الطيّبه في رصيده
خصّيت ابو وافي وانا براس مشراف=والعين تنظر للنجوم البعيده
الصرح شامخ والمواقيف تنشاف=ولا علينا من كلام الجريده

يا شاعرٍ مشهور في حبكة القاف=يا متعب الشعار ساعي بريده
رقيق قلبه للمواليف شفاف=وغليض لامست حدود العقيده
يسكن مدينه والطبايع للارياف=تلقا الدلايل كلها في نشيده
بالكامري صوره وصوره على الهاف=الله يزيده بالسنين المديده
له كلمةٍ تسمع وله حق الاشراف=وله حق تغيير المواضيع بيده
ولا احدٍ يبي من فوق حقه والانصاف=ونفس الكلام اللي نقوله نعيده
ولا احدٍ تعزوا في مساكين وضعاف=وفعولنا يوم السنين النكيده
عيال راشد مرهبة كل سياف=يشهد لنا التاريخ والله شهيده
اخذت من وسط القصيده والاطراف=مثل النخيل اللي تدلى جريده