الاملح الليل والمذن ومحرابه = ياكثر مابينهن ولّع مشاهيبه
مانيب يم الهجاد ولابي طلابه = لاكن جاني على غفلة معازيبه
واقلق سبات الغرام وثوّر ركابه = وقفّا عليهن تومّي به مشاعيبه
هوا هوا الجادل الرعبوب وإعجابه = اللي عليها وسام الحسن والطيبه
كن الزمن عوّد لغارات ونهابه = شوفي بعيني وراها يوم تومي به
قلب ٍ نزح عن هوا العشاق وترابه = اليوم في خرجها تودّيه وتجيبه
من سحرها صار بين اوسط وسبابه = نوب ٍ تدله طريق ونوب تغوي به
متبعثره جامحه واحيان تتشابه = ياحلو بعثرته ويازين ترتيبه
ويابري حالي على تسلهامة اهدابه = كني طريد ٍ برمشينه يثاري به
دام الغنج فيه مبطي تزهر اعشابه = وش عذره اللي عليه احفى عراقيبه !!
حلو النبا وش نباه إويش عنابه = اشهد لو يقابل اقسى قلب يصطي به
كنه ليا مر تشكي منّه ثيابه = ماتحتمل هالترف والملح تمشي به
مغري إن جاه النسيم وصار برحابه = يبقى على هيئته حوله ويجري به
تزهر خطاويه لا والله وترعى به = إبل ٍ لها حول مر الوقت تسريبه
يرزم عليها خفوق ٍ ناحت اقطابه = ويشره عليها ليا دارت دواليبه
ماردني عنها بعده ولا انسابه = ولا ردني مال حتى اقوم واصخي به
ولا ردني عنها السلطان وحجابه = إلا دروب الخطا والزيف والريبه
لاني تورثت مجد شيوخ وذيابه = يطول وقت القسا مابيع واشري به
ارسي عمد هيبته واوثق اطنابه = واشب ناره على عيطا واماريبه
هو زادي اللي ليا غيري تنحّا به = شيدت قافي عليه وقمت اغنّي به
والجادل اللي عليه الحسن متشابه = الجارف الغض عنق الريم والهيبه
يبطي كياني مالوح له على بابه = ويبطي فوادي تساعر به محاديبه