ياكاشف الغمه وللهم فارج=اجعل لنا من كل ضيقٍ خراجي
ونعوذ بك من كل شيطان مارج=اللي جيوشه كنها الليل داجي
ومن هول يومٍ بيّنته "المعارج"=الرابح اللي فيه مكتوب ناجي
ومن كلمةٍ يركض بها كل هارج=لو هي سليمه صار فيها اعوجاجي
ولو هي صغيره صيّروها "بوارج"=العرض كنّه سلعةٍ بالحراجي
ويالله جنّبنا غرور البهارج=اليوم صارت في ظهور ورواجي
ونطلبك تكفينا غلو الخوارج=واجعل لنا سنة نبيك سراجي
وافتح لنا في كل عسرٍ مخارج=انت الملاذ لطالب العون راجي
دعوات من كثرت عليه المدارج=وانت الدليل وهادي الانتهاجي