ابدا بذكر الله واصوغ التعابير=ابذل بها المجهود وارفع بناها
واسوقها يم الرجال المناعير=اللي على الميقاف ساقت خطاها
اقصد بها عليان ريف المسايير=مدله الخطار مكرم لحاها
مبروك ياعليان فوز المغاتير=بالنخبه اللي تعبت من بغاها
جبت البكار ولا حسبت المخاسير=ياملحقن حرب الحرايب مناها
لاجل القبيله ماحسبت المشاوير=سقت البكار الين وصلت هواها
عفرن يشادن المزون المزابير=هزعن مواخرها وطفحن لحاها
وارقابها مثل السيوف البواتير=الله من عيون الحسود يحماها
اليا اقبلت تقل تسوق التباشير=عن الجوايز ماحدن كد حداها
هذي هي مغيضات تفرق عن الغير=اقيامها تصعب على اللي نواها
لو جمع الوف الذهب والدنانير=ما جاب قيمه بكرةٍ من حداها
حازت على المركز وحطت تحاسير=على كبود اهل الحسد وحلفاها
وانا لواجبها ماعندي معاذير=انظم لها بيوت الشعر من غلاها
وصلاه ربي عد مزنٍ مزابير=على شفيع الامه ومصطفاها