قالوا مشينا قلت مافيه حيله=الوضع واضح مايفدن الأعذار
قالوا تشوف العفش قدمك نشيله=الله يجنب دربنا كل الاخطار
السالفه يالربع ماهي طويله=ماهو على كيفي وأنا موقع اقرار
عسى قرارن جاء يلحق بديله=ويسمح لنا يالربع في كل الأقطار
ويسوى تعبنا الصيد لونعنيله=نبي انتهنا قبل قصاف الأعمار
مشياً مع الريضان يومٍ وليله=يسوى رصيد الراجحي زايد إعمار
برضٍ نباته مثل طلع الخميله=وريح الخزامى كمله شوف الأزهار
غب المطر وتشوف يدرج مسيله=متحدرٍمن عالي الجال مدرار
جالٍ وماكر للطيور الأصيله=مابين عقبان وشياهين واحرار
اليا قال المغدا قلت رأس الطويله=أبي على مد النظر شوف الأقفار
نفسي على الطلعات مبطن عليله=وصبرت صبر أيوب مابين الأسوار
ومن البكر صبوا وزودوا بهيله=وتكفون حطولي مع الهيل مسمار
هذا هوى نفسي ولاأبغى بديله=وللنفس في غاياتها سر وجهار
وأنا جمل كل الحمول الثقيله=وعلى خفايا الناس ماني بسبار
ولاأمزح ولا أحب العلوم الهزيله=ترى كثير المزح يجعلك ثرثار
وراع الغلط لابد يسمع مثيله=وإن كنت تبغى الشر تبلى بالأشرار
والله إن يونس وسط كبده مليله=أومثل حاف الرجل ياطا على النار
وأنا شرحت الوضع عن كل ميله= من خوف يقلب هرجتي كل غدار
وأنتم في أمان الله مالي وسيله=ويني ووين الشام يالربع مشوار
وركبوا على جيبٍ جديد مديله=أبيض جميل الوصف من نوع فكس آر
راحوا يوم إن الأرض صارت محيله=يبون صيدن في حمى الشيخ بشار
والقارمن يادهام هو الدليله=في ديرتن بارد هواها بلا غبار
ولاأحد ينادي بالجهاز لزميله=شف الطريق يمين ولا على يسار
ناسٍ على البران مثل الهميله=وتعاف شوف البر من كثر الآثار
دروبهم ماهي عليكم سهيله=أنتم معشاكم قريبٍ للأنوار
وربعي معشاهم ديارن مهيله=ماهابوا الأخطار وافين الأشبار
على الأثر يتلون درب الجميله=تشرب من الخبراءعقب سيل الأمطار
وجوهن على غفله بهاك السهيله=وفزن بن الوعر والفشق ثار
يعجبك صوت الجيب من قو حيله=يوم أونس البنزين عن السهل طار
هاذي طرات العمر قبل رحيله=والله يعلم بالخفايا والأسرار
ياعيال راشد عزوتي بالقبيله=أرجو السموحه عن قصوري وماصار