ياحروف الشعر ياعطر القصيد=يابنات الفكر شيلي واردفي
هاتي الجزله ترانا بيوم عيد=واتركي هزل الكلام وغطرفي
لبتسامة طفل في يوم(ن)سعيد=اشرقت شمس الصباح بمعطفي
للصغير اللي لبس ثوب(ن)جديد=والكبير اللي بعيده يحتفي
والسعاده فالكم عمر(ن)مديد=هذي هي غاية منايه وهدفي
لكل من جانا وجاكم من بعيد=والقريب اهديه شوقي واحرفي
يامقر الطيب يالصرح المشيد=ياضياء الحرف نورك ماطفي(*)
بالتهاني والفرح شلنا نشيد=ياحمامه بالتهاني رفرفي
واكتمال العيد بالغالي اكيد=في حضوره زال همي وكلفي
هيه ياللي غبت .. يالظبي الفريد=هيه ياسبة جروحي وصلفي
ساري(ن)مفعول حبك بالوريد=جرحك اللي كنت خابر ماشفي
يازمان الوصل ! يالماض ِ التليد=ياعيون الشوق في قلب(ن)وفي
لارسالة عيد لو عبر البريد! =ولاسؤال ٍ منك لو هو مايفي
كل عيد وشوق قلبي لك يزيد=والمشاعر لاجل شوفك ترزفي
عاد عيدك ياعسى عيدك سعيد=انت ياعيد الخفوق ومسعفي