البدايه عندي اقول
يا سهيل ما شفتك مع النجم يا سهيل=وين انت غايب ياكبير النجومي
اسهر على شانك ولا انام بالليل=وان نمت يمك دوختني حلومي
قال سهيل
ياللي تدور طلعتي ما انت بالحيل=ماتلاحظ الكنه ولفح السمومي
ما نته بشايفني لو اخذت دربيل =باقي على المطلاع خمسين يومي
قلت
ايو الله انك جبتها تقل تفصيل=انا اشهد انه ضايقتني هدومي
واني مريض ولا تفيد التحاليل=مادمت عن شوف النفود محرومي
قال سهيل
لاشفتني ابشر ببرق ومخاييل=ترجع لكم طلعات هاك الحزومي
والطير ياخذله على الكف تدهيل=عقب المقيض اللي يبيد العزومي
قلت
الله يغسل الأرض بالغيث وتسيل=ويزيل عنا كايدات الهمومي
والطير يكمل صفة الريش تكميل=وخوت هل المقناص ربعن قرومي
وسلامتكم

صح لسانك يابن مياس
محاوره رائعه
وأنشاء الله تشوف سهيل ويجي السيل

المشاركة الأصلية كتبت بواسطة خلف الفريد (المشاركة 171057) ابو شليويح ابيات تحاورية رائعه بين عال ٍ في مكانه وعال ٍ في قدره ... وحقا لاتلام اخي في حب خوة الرجال والبر والمقناص والطير الاصيل لانك ابن شليويح وهواسم تدليل للطير (شلاح) وهذه اشرف الهوايات واكبرها قدرا ... اسال الله ان يغيث العباد والبلاد وان نرى نجد خضراء ومرتوية سيلا انه القادر ... وصح لسانك على هذه الرائعه .. لاعدمتك