السلام عليكم ورحمة الله وبركاته
هذي قصيده قلتها بعد ماكثر على الهرج بسبب الصقاره وعشق الطيور صار بعض التهكن مثل قول وين الصيد وانت ما تجلس بس تدوج وغيرها

قالوا علامك عشت عمرك تناكيد=وقلبك بطرد الصيد زايد هيامه

مالك ومال الطير وش جاب لك فيد=غير التعب بين بوجهك علامه

قلت اتركوني في هوايه وما اريد=هذا منى قلبي وغاية مرامه

قلبي تولع في هوى البر والصيد=والطير والمقناص كل اهتمامه

انا اشهد ان شوف الخلا عندنا عيد=(لاطاب نوم اللي حياته) ندامه

ياما حلا طلعات هاك الجراهيد=ماداج فيها الناس مثل الثمامه

لاصرت في حدري رميلان تحديد=انا اشهد انه لاهل الصيد خامه

ارض بها برق الحباري ملابيد=وراع الغنم ماحط فيها خيامه

وانقل على كفي حرار مجاريد=شقر من الشبراق فيها علامه

اللي تردد عازم الخرب ترديد=لو كان عاصي عاشقات ارغامه

وانا ابتليت بهرج ناس مقاريد=اللي على الفرغ تطش العمامه

واقولها وابا ارفع الصوت واعيد=يوم ن كل قام يكرب سهامه

كان الولع بالطير فيها مناقيد=انا اشهد اني غارق بالملامه

بالله كفو هرجكم يالاجاويد=مافيكم اللي مثرن بي كلامه


وسلامتكم
نايف بن شليويح الفريدي

المشاركة الأصلية كتبت بواسطة ابـن مـطــيع (المشاركة 160908) صح السانك يانايف على القصائد التي في الصيد رائعه جداً ممبدع ما شا الله عليك نتظر جديدك لي منك طلب بسيط أذا عندك غزل أبي لي غزليه؟!: تقبل مررررررررروري يا ابو شليويح

المشاركة الأصلية كتبت بواسطة منصور الوسوس (المشاركة 160918) نايف بن مياس ما اظن يلومك الا من لايعرف الولع بالصيد صح لسانك على هذه القصيدة الرائعة جدا ابيات غاية في الجمال ووصف راقي للقنص تقبل وافر التقدير

المشاركة الأصلية كتبت بواسطة ميس الريم (المشاركة 160925) ارض بها برق الحبـاري ملابيـد وراع الغنم ماحـط فيهـا خيامـه وانقل على كفي حـرار مجاريـد شقر من الشبـراق فيهـا علامـه شعر جمـــيل وتصوير مع التشبيه أجمل صح لسانك واستمر على هوايتك

صح الله ألسانك ,,
//
قصيده في قمة الجمال,,
//

بإنتظار جديدك..
//
أختك..طموح

..
احترامي وتقديري