الله عطـاني ياملا ماتعاطيت=عطا الكريم ورحمته واقتــداره
وســــوا لي الله ياملا ثم سويـت=بيت ٍ بطيبه مبتدين بعمـــــــاره
ياللـــي مشيت من الحرم يمته جيـت=قباء يمينه والقريظه يســــــاره
في عـــالي الحرة بنيت وتعلــيت=بابه على القبله وتكف الاشاره
والشكــر لله بالمدينة لنا بيـــت=من بيتنا شوف الحرم والمناره
وليـــا اذن المذن عمدته وصليــت=تسوى الإمارة والحكم والتجاره
وهـــذا الذي يامحمد ٍ لك تمنيــت=بعد الكفاح اللي جهاد وجبــاره
خمـسة عشر عام كفاح لها امضيـت=اسهر لياليها واواصل نهــــاره
وانهـيت مشوار الكفاح وتهنيـت=كاس الحلا ماحلاه بعد المراره
مانـي من اللي شيّخه شيخة المـيت=وارث قبور بين عشــــه وداره
والمـجد لي ميراث واحسنت واوفـيت=نادر حرار ومن مواكــر حراره
مواهب من فضل ربي لها اعطــيـت=واملك على خيار المعاني جداره
والبخـل ماريده ولا الذل ذليــت=والراي واحد ما يتغيــّــر مساره
وافحـص لرايي ولصوابه تحـريت=ثم استخرت الله قبــــل اختياره
بعـده رفضت اي تراجع وعيــيت=قرار رجل ٍ ما يتغيـــــــر قراره
ولاخـذت راي اللي تقل جسم خرتيت=متشارك ٍ فيه الغبـــــا والثواره
لولاه ينجب ياعرب خادمة بيـت =بيت ٍ عسى الباري ومر في دماره
ولاخذت راي ضعاف الاريا ولا اعطيت=سمّي الفريدي لانفــــراده بشاره
اسم الزعيم اللي انا فيه سمـّـيت=جد القبيلة عزهـا وافتخاره
اسم ينادي ياهل المجد تصويـت =يوم الوغى اللي فخرهم في نهاره
كم شـيخ قوم ٍ شايع الفعل والصيـت=بعده صديق وتـاب بعـد انكساره
وخســــر الجموع اللي جمعها تشاتــيت=وخسر رياجيله وخـسر انتصـاره
وخســـر الرجال ان قدّم البيت للبيــــت=وخسر هاك الهيبة وخسر اعتباره
ماهــــي علوم فلان وفلان والهيـــــــت=يوم الحرايب ماعـــرف وين داره
خيـــول ودق طبول ويامحيي المــــيت=اللي قدايمهم مصـــــــــــانع وثاره
ولااســـتخدم التسويف لعل ياليــــــت=اخاف لاتمضي حيــــــاتي خساره
ورقيــت مع سفح الجبل لين عديـــــت= عدوات ذيب ٍ منه كــّـــره وغاره