ياسابي(ن) غازي بلحظات غداره=ماتدري انه زال عهد العبوديه
ولا تدري ان هناك من ياخذ بثاره=ولا تقبل الجاهه ولا تقبل الديه
غازي علينا عالي(ن) حيل مقداره=ولا نتركه بيدين ناس(ن) حراميه
وحي البيوت اللي كما الروض وازهاره=من شاعر(ن) دايم معانيه سحريه
غازي وغازي عاشق الفن واسراره=فن الغرام اللي معانيه ورديه
ياحيها لو هي من الكبد مزّاره=ياحيها وياحي من قالها حيه
يشكي طعون(ن)من هوى البيض وآثاره=وروح المشقى دايم الدوم مبليه
والحب سوق(ن) يدخله راضي وكاره=ولا يخرج الا ما معه غير ربيه
كم واحد(ن) طبه ولا احتاط لاسعاره=ويصبح ضحية لعب هاك الشريطيه !!!!
والبيض حطّنّا على دربهن شاره=ماكننا اوادم ولا الدار محميه!!
وقضيتك ابين من طويق وجداره=واكبر علينا من جبل شيخ(سوريه)!!
سندتها لعظم العرب عمد مختاره=وابشر بعزك يوم سندتها ليه
سندتها للي يعن غالي مهاره=ولو حاجتك فيها الغلا يقول ..مشريه
باذن الولي لجمع لي جيوش جباره=قواتنا وقوت (درع) خليجيه !!
واشنها غاره وغاره ورا غاره=حتى نجيب اللي ترك فيك ماريه
ولو دونها ابليس العور ناح مزماره=نجيبها لو هو على جيب دوريه!!
ولو دونها بحر به جيوش جزاره=نهينها .. ونسيّر اسطول حريه!!!
انا عضيدك دام الايام دواره=وما دام عندي عزوة(ن) نارها حيه
شف لي حبيبك باي الاقطار واخباره=انته فريدي والعزاوي فريديه

انتـه فريـدي والـعـزاوي فريـديـه
كفو وجمل الله حاالك قصيده جزله من شااعر جزل ولاهي والله غريبه
وانت غني عن التعريف وجعلك في زود في زوود..
بدران26/7/1431هـــ 11.28صــ