الزمان ايهد حيلي واتقاوا =لين وقت الغربله جاب المصيبه
قبل بضع ايام لا طحت اتشاوا= مثل باق الناس لا حاجه غريبه
واثر ربي كاتب لي الشقاوا= وكل حي ما يسجله يصيبه
لج قلبي لجت سباع تعاوا = مع طلوع النور في راس الرقيبه
افختن من العشاء والجوع ماوا =في خلن ماحولهن قوتن تجيبه
والمنام ابعد من اديار الشلاوا= لي شهر عيت عيوني تهتنيبه
عقب شفت اللي سكن قلبي رساوا= ساكنن قلبي وعيا يعتنيبه
لين مشتني مع دروب القساوا= وابعدت وجروحها فيني عطيبه
ياولد خالي جروحن ماتداوا= اهون الأجراح بهذل في طبيبه
عقب ماقلبي هوى قام ايتهاوا= لين راسي بان للعربان شيبه
هاوي خلن لعب بالقلب ماوا= لعبت البيلوت من بين اللعيبه
لاعب لي جد والعب في رخاوا= ومن رخا قلبي تغانمها حبيبه
لين حكمني على الميه وساوا =كبتت وانا اتفرج فالغليبه
مير عقب الغيم لابد الصحاوا =والقمر لابان نوره نقتديبه
واللوازم ما تقضى بالمراوا= قوم قبل الحب صاحبك يغديبه
قوم واركب يالرحيمي بنتخاوا =يم دارن نازحه ماهي قريبه
فوق حيب ما يمده بالهداوا =غير شيخ شيخه بالقوم طيبه
راعي الأصناف يشريه بغلاوا =ما يهمه لو يحت الجيب جيبه
وان نتلته والكفر قام إيتلاوا =لاق وصف الشاص لي من دون ريبه
كنه ابن مطيع لامنه تساوا= للدلال وللمهمات الصعيبه
وان عطيته نز والدرب ايتطاوا= في ثواني كل طبلونه يجيبه
خير من كثر التلعوز والملاوا= يا صحيبن ما تراخا مع صحيبه
دونها ما اشوف للدنيا حلاوا= اشهد ان الحب همن يندعي به
دار اهلها لارفاق ولا عداوا= امش دام الذيب الأسحم في قليبه
بس حبه لو تحرمه الفتاوا =بالرضا من صاحبي ماهي غليبه
يمكن الروحه تحقق لي مناوا =من عليمن ماتعرف الناس غيبه