واطرقت في راسي وانا اقول لاحـول =وقــامت شجـــوني كل ظـنٍ تظنه
سجيت سجــة ســـاكن الحــال مبـدول=ابيــع واشـــري في دماس المظنه
وكنه يجـــر القــلب من فوق عــاقـول=من زود ما يبرى ضميـري ويكنه
معقــــول ياسيــد الغنـــادير معـــقـول=تبيعـــني بخــسٍ على غيــب ظنّه
وش غيـّرك يــا بـاهي الــزين ودلـول =عطني مــرار الحــق لا تســتكنه
قلي حصل ماصار او نقص محصول=او صـــولةٍ بالكفــر للغيـــد سنه
وردت لي الفكرة وانـا قبــل لا اقـــول=وكنيتهــا بالــروح وبالـروح حنه
قلت اسمــعي يـابنـت للـخـيـر مـدلـول=وطول الليــالي للخبــر يظهــرنه
رايي انا والخوف مـن ســر مجــهول=خوذي ثلاث شهـور مع مثـلـهـنه
روحي وهيمي بالنقا عرض مع طول=لين اتثبت حـــق مــا اقـــول كنـه
واليا جزمتي خير مــع دايــر الحــول=وعهدٍ علي ما اروم منك المحـنّه
تلقين غيري غيـر ومـن العـرب زول=تمشي عـيــاراتك عـلـيـه وتـرنه
وانــا ربيــعي فــرد بالنـــاس مجمول=اليا صفا لي حـق مــا فــيـه لـنـه
مديت روحــي لـه بـالـحــب معـــمول=وكـاس الـوفاء بيمناه واقول هنه
روحـي وثــوب الستـر يابنت مسـبول =ومذكــورة بالخيــر ياحــال هنه