سافر فمان الله ياعز محبوب=عسى السعاده في حياتك تجدها
ياصاحبي لو كل ممنوع مرغوب =ماغطت العذراء العفيفه جسدها
ياوجد حالي كل ما افتر دالوب= وجد المليك اللي دياره فقدها
تشتيت شمل وضيعت دروب= وقلوب ونهايةٍ حتى العدو ماحمدها
والفرحه اللي عمرها دوب يادوب= ياهاجسي ماتت وهي في مهدها
للحزن غيمه كلها سحب ونصوب =تشوف بارقها وتسمع رعدها
دمع الرجال اللي على الخد مسكوب= ماهو ب ضعف أو ذل أمر وادها
زلزال هز الارض في ساعة غروب= مقياس ريختر قوته مارصدها
مشاعري والعقل صولات وحروب =ومعاركٍ صارت ولا احدن شهدها
الّمها من صوب...تنهار من صوب= همّ ٍ يصبّحها...وهمٍّ هجدها
ملح السنين))الماضيه شفته يذوب= قدام عثرات الزمان ونكدها
و((حلم السنين المقبله دونها طوب= الله يسامح من بدينها عقدها
يامركب الاحزان والحزن مكتوب= نواخذك قل: وش سبايب رمدها؟؟
إلا طعون اصحاب واحباب واقروب= أطيبهم اللي وقفتي له جحدها
إن كانها زله فانا أوعدك ماتوب= لو كل عقال العرب تنتقدها
وإن كانها هفوه فانا كلي أذنوب=الله يغفرها.. ويغفر بعدها