لو كل غلطة على الصاحب نسجلهـا=فقدت ثلثين من مجموعـة اصحابـي
لكن نطـوف هذيـك وذيـك نجلهـا=ولاقول وش قال زيد اليـوم بغيابـي
اشيـل زلـة رفيـقـي واتحملـهـا=ولا ركض وراء كل فارغة بمشعابـي
اشوف وأصـد واسمـع واتجاهلهـا=واجحد مدى غيظ قلبي واملك اعصابي
وأرجى عسى صاحب السية يبدلهـا=لا شافني عـن طريقـة قافـلاً بابـي
والا تـرى كـل كلمـة لـو تـحللها=تطلع بوجهين من سلبي إلى ايجابـي
واللي يبي المشكلـة دائـم يحصلهـا=يا صعب درب الوفاء يا هون الأنشابي
وسيرة هل الطيب مهونهـا ومسهلهـا=لو انهـا بالعلـوم ومسـح الأشنابـي
لكـن تجـي ساعـةٍ وتبـيّـن اعللها=لا صار وقت اللزوم وحـزم كلابـي
والهرجة أعـرف عواقبهـا وكايلهـا=قدام تخطـي هدفهـا وأنـت بالنابـي
والنفس ما يعزهـا يـا كـود شايلهـا=ولا يطيب للناس من لنفس ماطابـي
وتلقى من الناس مثل اللـي تعاملهـا=وإليا اختلف شي تلقى منك الأسبابـي
وقناعة النفـس رأس العـز يكملهـا=اليا حصـل قوتهـا والستـر بثيابـي
وأرزاق غيـرك لغيـرك لا تخايلهـا=لك ماكتبلك ولي مـا خـط بكتابـي
كم واحداً ما يبيـن لـو هـو آكلهـا=بسدود بعض الرجال اضيع الارقابـي
واعرف ترى الناس ماتجحد جمايلها=وجحاد فعـل الجميـل يقالـه هابـي
واللي مشاعـر دروب الحـق قاتلهـا=منين مـا كـان بيّـا موقـع ارهابـي
وشكواك للي ظروفـك مـا يعدلهـا=صيحة خلاء ما لهـا فـزاع ومنابـي
وقيمتك مـع نـازل القيمـة تنزلهـا=والحر يثر عليه اللـي معـه رابـي
واختر ثيابـك علـى قـدك وفصلهـا=ترى ابليس اخرجه من طوبا الاعجابي
والكلمة اللي انت منها تستحـي قلهـا=ترى اليخطا سنان الرمح مـا صابـي
آخر هديـه لـو الواجـب معجلهـا=ولو فا يدتها لغيري ولّـى أنـا مابـي
معقـلاتٍ ركابـي فـي مساهلـهـا=وعندي خبر ما يفك الوسق مطلابـي
ترى الاصايل معـادن مـن سلايلهـا=نصيحةٍ مـن شريـف لكـل عزابـي
طول القصيـدة بـلا معنـى يـمللها=اثبت ما قلـت مـن بعـد التجرابـي
امشي مع الناس واخـذمـن دلايلهـا=وبضاعتي ما تجي مع كـل جلابـي
والهاملـه طردهـا للـي مهملـهـا=وليّه عن اللي بدون عقـال مجنابـي
ويا رب لطفك بروحي يـوم تسألهـا=عن ما جرى في حياتي وانته أدرابـي
ويالله تعـدل عـن الـزلات مايلـهـا=يا واحداً من لجأ بحمـاك مـا خابـي
ويا رب ستـرك ونفسـي لا تفشلهـا=ليا جاء النهار الصعيب وقدم احسابـي
والنفس فـي طاعـة الرحمـن ذللها=يعزهـا ذلهـا فـي يـوم الاحزابـي
تخـف عنهـا الذنـوب ولا تحملهـا=برحمتك يقرب من أقرب كل الأقرابي
وصلاة ربي عـدد مـا هـل وابلهـا=علـى نبيـاً تجنّـب كـل مرتـابـي