البارحة بالقلب هم وولوال=افكار تشعل بالضماير شعيلي
دنياي اقايسها على كل الأحوال=بالعرف والتفكير واشيل شيلي
والنفس أنزلها على كل منزال=أخفي مساويها وأقول الجميلي
من خوف تبدي خلتي بين الأنذال=واللي قسم لي عند ربي يجيلي
ولا اعاتب اللي صد عني اليا مال=ليا كان شفته مقفي مستزيلي
بالك تسايل واحد عنك ما سال=ومن لا يودك لا تحطه خليلي
إن كان ما جاراك خله على الفال=وأترك كثير الهذر مابه حصيلي
القى بدل من حط من دوني أبدال=عرفي مقنعني وقلبي دليلي
وأطلب عوض من صد عني بالأقبال=من واحد من مد جوده جزيلي
ولا ننكر المعروف اليا حالت الحال=نجزى هله بالطيب لو هو قليلي
وأعرف ترى بالناس ماكر ودجال=خذ الحذر كل الحذر لا تميلي
اليا شفت ما عيفك حطه على البال=وتحمله لو كان مر وثقيلي
وعليك بأهل الجود وأكرام الأسبال=ما يذكر إن العوشزة به مقيلي
ولا شك عز النفس بالمنزل العال=يبعدك عن منة خطاة البخيلي
والمال يرقي صاحبه روس الأقذال=يمتاز لو هو بالمجالس طفيلي
قدامنا قالوه حاوين الأمثال=يحيي العظام الباليات النحيلي
ومن قل ماله صاربه بعض الأحوال=لو هو صعيب الراي يصبح ذليلي
ودنياك هذي بين الأقفاء والأقبال=الله مصرفها على كل جيلي
محصي جميع الخلق من كل الأشكال=متصرف بأرزاق خلقه كفيلي
يالله تغفر زلتي يوم الأهوال=ياعالم في دقها والجليلي
وصلوا على المختار ما هل همال=شفيعنا يوم الحساب المهيلي