الا يا هجوس الشعر ما تنفع الأمثال = شفوف القلوب اللي بالأحزان ملهوده
بعد ظلمت ظلماه فوق السهل والجال = على أقصى مدى ما يستطيع المدى حدوده
تنهت من لوعة مصيبة وضيقة بال = وهبت لهايب هاجسي من عقب نوده
على افراق من فرقاه ما تنفدى بأموال = ولا تنفدى بأرواح ماهي بمعدوده
بعد ما رحل عنا على ساقة الرحال = مع الطرقة اللي للمخاليق مشهوده
نهاية حياة الحي قبرٍ عليه ايهال = ثرى حفرةٍ في باطن القاع ملحوده
الا يا عسى قبر ٍ سكن به كريم اخصال = من الروضة الخضراء مهانيع ٍ وروده
قبر جازي الوسوس لطوبى وصل وإيصال = بجاه الكريم المرتجي عفوه وجوده
رحل عن هل الدنيا وذكره بها مازال = مآثر فخر في صفحة المجد موجوده
بكت له صيان الحيل والكيف والفنجال = بغاديدها ورسلانها ومبخرة عوده
وقولة هلا وفزة حجاجٍ قبول إقبال = وبيتٍ من الأقراب وأجنابه وفوده
ونخوة عريبٍ لا نتخى للثقيل إشتال = وعلمٍ على رد البراء منه مردوده
كريم الخصايل وافي الكيل والمكيال = زبون المكارم غاية الطيب مقصوده
طليق اليمين وشامخ القدر والمنزال = نظيف السريره والعرب كلها شهوده
على جازي الهجاج ماالوم دمع سال = من عيون محزونٍ جرح حرها خدوده
إي والله عليه أبكي وتبكي عليه رجال = قبيله لها ذكره وفعله ومجهوده
ولا هو جزع من حكمة الواحد المتعال = رضا بالقضا من فوض أمره لمعبوده
لاشك الرجال اللي لهم بالجزال اجزال = عزيزه على أهل الطيب بالطيب مفقوده
لعل البقاء باللي لنا بالآمال آمال = حرارٍ على وكر الشرف عنه منشوده
على وكر أبو نواف نعم الحرار عيال = عيالٍ على الهقوات بالافعال محموده