مرحبا ترحيبة النفس الزكيه=من رجالٍ تشتعل طيب وحميه
مرحبا ترحيبة تضفي عليكم=من القصيم إلى الحدود الساحليه
باسم هادي شيخ حادين المطايا=للشرف والجود واليمنى النديه
مابقى إلا النقره تصير الهبايب=عود أزرق بالليال السرمديه
كلها من جية شيوخ القبيله=وسم طيب وعز جاه ومقدريه
شرفوا بالدار والدار الشريفه=ريح عود وروح جود وشاذليه
والنخل وتلالها وطلة جسدها=تحتضنكم بالغلا روحه وجيه
شفت كل دروبها تزهر خزامى=مابقى إلا تشيل لحن السامريه
طيبه والطيب بشيوخ نصوها=من حجاز الجود ومن نجد العذيه
شيوخ حرب الوافيه في كل قمه=راية بيضاء عليها النار حيه
مجدهم ضافي عليه الله وأمانه=قبل وقت الدين يوم الجاهليه
ويوم بان المصطفى بدين الهدايه=شف مزينه حاربت لأجل القضيه
وطال وقت المجد في كل الليالي=لين جاء وقت الجهل والبندقيه
قسمهم بين العرب فوق الجزاله=وبالعطيه قسمهم فوق العطيه
مايرد لديارهم ياكود عاني=عج خيل وبرد ليل وجرهديه
وبان عصر الحق والجادل تحنت=للإمام بعز ذات وحسن نيه
قام فيها ابن سعود ولا تركها=للذياب وللسباع الأجنبيه
وحرب قامت قومة يذكر سعدها=مامشت بالزيف لنفوس رديه
دورنا بالحق والتوحيد بارز=باب جده بقومة الشيخ الأبيه
يوم ابن مبيريك في مده تفانا=قال هذي للإمام أول هديه
وإنتصر جيش السعودي والحقيقه=إندحر جيش الضلاله والخطيه
وغيرها يوم الإخوان الله نصرهم=نص حرب تقودهم صبح وعشيه
ويوم مالوا بعض مخفين النوايا=قادوا نحور السريه بالسريه
وش أعد وش أقول وش أخلي=مجدهم منار بعيون البريه
والوفاء والحق وعلوم المكارم=بالقبائل كلها نعم السجيه
والقوافي لو تشيب بمدح ربعي=ماتشيب بصدري و تطغى عليه
أرجع أرسم دربها بين المحاني=لين تبدأ تشوش شوق وجاذبيه
ويتساقط توتها وينبت ورقها=بالعقول اللي راوبعها مديه
ولو بدالك قافها بين القوافي=قلت ياحي الدلع والنرجسيه
سقتها من خافقي طيب وكرامه=للشيوخ وكل من بان بمجيه
ليلة الجمعه هلا يأغلى الليالي=مع عبارات الوفاء وأجمل تحيه
بامورانا اللي نصوا والطيب ضافي=من القصيم إلى الحدود الساحليه

أرض المدينه منبع الحق والنور=سلام مني شوق حب وبدايه
سلام من واهج غلا صدق وشعور=بإحساس خفقات القلوب وهوايه
ثاني حرم فيها على الخير معمور=للدين والتوحيد منبر وآيه
تشد الرحال ليمته عفو وسرور=ويغسل النفوس من الدرن والغوايه
عليه قلبي يرزم إرزام ويثور=يبي زكاة النفس قبل النهاية
كن الفؤاد بساحته منه ممطور=والبال برحابه عن الزيف تايه
أغليه وأغلي من سكن فيه مقبور=حبيبنا محمد نبي الهدايه
وأنا عليه دين مبطي من دهور=يموت شعري كان ماله حكايه
ويموت كانه ماكتب مدح وسطور=للي لهم بالمجد والعز رايه
مثل الكريم اللي به الطيب مخبور=أبو محمد للمعالي كنايه
شيخٍ بنى بالعز ساحات وقصور=وأكبر من إحساس القصيد وثنايه
درعٍ لربعه بالوفاء حزامٍ وسور=وعن السموم ظلال عطف وبنايه
وياشيخ ماجيتك من الوقت مقهور=وأنته سند رأسي وربي رجايه
أبشرك في خير والحال مستور=بعيد هقوه والثريا مدايه
لا شك أبذكر وقفتك مابك قصور=يابو محمد ياكريم السجايه
وقفت للتنوير والعلم مذكور=عكس ثقافة جيل مثل المرايه
المنتدى اللي صار واضح ومشهور=دعمك وتشجيعك منار وقايه
كلمتك فيه تنور الدرب لعصور=ومشوا على قولك وقولك كفايه
موقع شرف يبني ثقافات وجسور=لعيال راشد بإنتقاء وعنايه
مبني على طيب التعامل مع الشور=للكل مابه زيف قول ودعايه
عليه لجنه ترسم الحق وتدور=حول المعاني الساميه والحمايه
بدابه حويان وأنشاه مشكور=لأجل القبيله وأنقى الأهداف غايه
هذا زمان إعلام وأوطان وبحور=وقف وقال بصدق منهو معايه
وشمر عن كفوفه نسل سامي الدور=نسل الوفي غنام طيب وروايه
قال الجماعه حقهم فيه مجبور=واجب علي بدون قول وصايه
عبدالله اللي فكره يشع مايبور=عاقل وناضج طيب عرف ودرايه
طيب كريم اخلاق ويقود جمهور=مايلتفت للناقصه والوشاية
وقاموا على دربه ميامين وصقور=فزعة وفاء حميا وشوق وهوايه
صعبٍ علي أحصيهم بعدل معذور=لو إني أبني من وفاهم وفايه
وأرض المدينه منبع الحق والنور=سكن بها شيخٍ على المجد رايه
عساه بالتوفيق والعز مسرور=وانا عساي أنال مدحه عسايه