|
شكرا لك ابو زياد تعودنا منك مثل هذا الاهتمام اتمنى ان تضيف بقية قصائده لاهنت يستاهل شاعر المجالس علي بن زيد |
نصـــــــــــــــــــــــ ـــــــائــــــــــــــــ ــــــــح ذهبيــــــــــــــــــــة
بسم الكريم اللي علينا معتلي = ابدا واقيس الكيل بالمكيال كلام لعيالي ويهدى لغيرهم = بمناسباته يسمع وينقال كلام من عاصر وخاض التجربه =جرّب وشاف من الحياه اشكال ابا اشرحه تذكير للي يفتهم = عسى الجمال تباري الجمّال نصايح نرسم بها الحط الخضر = لعل مافيها يفيد اجيال اقول ياللي تستمع ماقوله = من التجربه خوذوا حكم وامثال بيت الشرف والطيب يوصف يالشرف = وبيت الردى هو ماكر الانذال والحر تعرف همته من هومته = ولكل موقف وقفة ورجال والعقل من رب البرايا نعمه = والعاقل اللي رافق العقال اختر صديق صادق في كلمته = واحذر من اللي يكذب ليا قال واحذر من النمّات والكذب والحسد = ترى نتايجهن بلا واذلال الكذب والنمه صفات الخايب = والحسد للنعمه يصير زوال وترى جليس السوء للشر يدفعك= حيثه يزين لك خبيث افعال اختر مجالس طيبين المذهب = حتى تطيب بطيبين الفال وليا تكلّم عاقل لاتقاطعه = انصت لهرجه واسمعه لوطال ولاتجادل برايك تحاول تفرضه = ومن جادلك خلك وسيع البال وحذرك لاتدخل حرام بمالك = اكل الحرام من اقبح الافعال احفظ حدود الله يرتاح بالك = واحرص على كسب نظيف حلال ولاتغش في بيعك ولاتقرب الربا = ترى الربا ذنب وبلا ووبال ومن اطيب الاعمال تقدير جارك = واكرام ضيفك ياعريب الخال الجار حق تحفظه في غيبته = وتسانده وتساعده بالمال تعطف على صغاره وتحفظ كرامته = وتشاركه بالهم والغربال ومن الواجبات اللازمه ستر عورته = وللزله اللي تنحمل حمّال اياك لاتنظر بعورة جارك = هذي صفه ماهي صفة رجال ون جاك في بيتك من الناس عاني =قدم لجزلين الرجال اجزال ترى مقامات الاوادم تختلف =والارض فيها مطمن واجبال وليا مشيت الدرب خلك متزن = وببلا عمل لاتكثر التجوال واحفظ حدودك لاتجاوز غيرك = ولاتقبل العيله من العيّال وليا بليت بعيلة من معرفه = حاول تجاوزها بحل اشكال واوصيك واحذرك عن بوقة العهد = اوف العهد مهما تكون الحال ولاتسمع النمه ولاتخلف الوعد = ولاتجامل الكاذب ولاالمحتال ولاترافق المسرف ولامن يبخل = الزوديذهب والهزال اهزال وحاول تزود بالادب والمعرفه = في كل وقت ليا حصل مجال واحذر من الايام واحسب لغدرها = الوقت ليا منه تعدل مال حلو الليالي قافي له مرّها = وجميع شي مقتفيه زوال ون مسك من الوقت شي تكرهه= اصبرعساه يحلها الحلاّل لاتشكي الا للكريم المنصف = حيثه هو اللي يعلم الاحوال وتجنب اهل الكبرياء والغطرسه = ولاتعامل الطامع ولا المحتال وتعامل بذمّه وعليك بالوفا= اوف التزامك لو ربع مثقال ترى الرجل في حق غيره وواجبه = لو كان حر مكبل باغلال ولااحد من النسيان والضعف والخطا = معصوم ولابالبينات جدال ومهما تكون الحال للرجل غفله = والحر ياقع في يد الحبّال واحيان يوجد بالمكاره منفعه = واحيان يلقا بالخبال امثال والناس مختلفه بجوهر ومظهر = وبالمعرفه والفهم والافعال والضعف لايمكن يقاس بقوه = ولايشره الرجلي على الخيال ولايجتمع بالكاس مالح وحالي = ولايستوي عاقل مع الجهّال ومن لايودك لاتوده وفارقه = تراه لو جامل مرض سلال كرامة الانسان هي راس ماله = ماهو هوى يتبع ولعب اعيال ولاتتبع المقفي ولو كنت عاشقه = خلك لحملك يافتى شيّال امطارد المقفين نقص ومذله = طرد ورا المقفي عنا واهبال وليا جفتك الدار بدل بغيرها = ليا استخبثت مالك بها منزال والعلم حاول دايم انك تكسبه =ترى المسالك واضحه واطوال من المهد حتى اللحد خلّه هبابك = والوقت تضييعه يسمى اهمال ياطالب العليا ترى العلم ساسها = مطلبك غالي والحمول اثقال والدين هو لب الحياه ونورها = مطاعة الله صفوة الاعمال وختام ماقلته صلاة على النبي = ماهل وبل من مزون اخيال |
هذي غزلية (( هدية لأهل القلوب الخضر ))
نهار الخميس اشرفت في عالي المرقـاب=اعالـج لواهيـب علـى الكبـد محتـرّه افكر بعالي مرقبـي ماحسبـت احسـاب=لامـور تحـد القلـب ساعـات وتجـره انا ماحسبت لشي ولكـل شـي اسبـاب=وامور الهوى والعشـق جربتهـا مـره لكني عقب جربت حطيـت دونـه بـاب=عقب ماتعبت اعذرت من خيـره وشـره طلعت الطويل وعدت من طلعته منصـاب=ولـون قبلـي مـن تـعـلاّه مـاضـره الاوعذابي يوم عينـي شقـت باغـراب=عقب شوفهم صارت حيـاة العنـا مـره تجدد علي الجرح والجرح ماكـد طـاب=ابانسى الجواهر وعرضت قدمـي الـدره وانا صرت مثل الل رمى له هدف ماصاب=تركت النظر بالعين وابحث عـن الجـره رماني مليح الوصف بالعيـن والاهـداب=مع الاشقر المجـدول والصـدر والغـره لمحت الجمال ومنظر الحسن لي جـذاب=وبلحظه حواسيسي مع الحسـن منجـره بعد ما لحظته صرت متوتـر الاعصـاب=وجميع الجوارح من هوى الزين منضره وانا ليا ذكرته زاد قلبي ولـع واعجـاب=وافكـر مثـل ماقيـل بمعـاود الـكـره لكنـي فقدتـه مثـل ملـح بـمـاْ ذاب=فقدت الامل في داعـج العيـن بالمـره جريح الهوى مملوك لوتنصحـه ماتـاب=يصارع بحر من حب ويعيش فـي بـره |
بسم الكريم المعتلي خالق الكـون=الواحد اللـي عـمّ فضلـه ومنّـه ابدى كلام لـه دلالـه ومضمـون=والمستمـع عليـه تقديـر فـنـه في منطق موزون والشعرمـوزون=خواطر فـي ضامـري مستكنـه ابا اشرح اللي داخل الفكرمكنـون=دن القلـم يابـدر والبـوك دنـه فكرت بالدنيـا وماكـان ويكـون=ومتابـع التفكيـر بالكـون سنـه وفي عالم مابين صاحي ومجنـون=وظواهـر سيرالبشـر غيـرنـه ولقيت كل انسان شاقي ومفتـون=يسعى لامـور بالخفـى يذبحنـه همه مع الدولار لوصـار قـارون=ودراهمـه يـمـوت ماريحـنـه ياعابد الدينار والقـرش بالهـون=دنيـاك مفتـاح لـنـار وجـنـه لاتجمع الدنيا على غيـر قانـون=كـم واحـد دراهـمـه يلعنـنـه ولاتفتكر عمرك من الموت مامون=لحظات عمـر الفـرد مايسعفنـه اطلب حلال من الشبهات مصيـون=تبقى سعيد وراجـح العقـل هنـه والضالين اللـي هدفهـم يضلـون=افكارهـم حتـى الذكـي يبحلنـه عبّـادة الـدولار حتـى يموتـون=اللي بلدهـم كـل مخـزي مغنـه نوب هدفهم يحرقـون ويبيـدون=ونوب هدفهـم يزرعـون الاجنـه في كل موقـع ياصلونـه يعيثـون=مراكـب حتـى القمـر ياصلنـه عاثوا فساد وشرهم هـدد الكـون=اقمارهـم تنصيرهـم ينشـرنـه عبر الفضا للكفروالشرك يدعـون=افكار من يضعـف لهـا يغيرنـه ذولا دعاة ابليس وبليس ملعـون=اوفوا بعهد ابليـس كذبـه وظنـه مار المصيبـه مسلميـن يرابـون=تعامـل فـي بيعهـم فيـه لـنـه يامدين المليون في ربـع مليـون=تذكّـر الـلـي عـالـم ماتكـنـه احسب احسابك قبل ماتموت مديون=والمال لغيرك وانت مسئول عنـه تقاسموامالك بعـد مـا يصفّـون=وجسدك ديـدان الثـرى ياكلنـه والثاني اللي يدعي الدين ويخـون=ليا لاحت الفرصه لعـب بالاعنـه في كل فرصه له تصرف وله لون=وتصرفـاتـه للـمـلا يكشفـنـه ولقيـت نـاس للمشاكـل يغنـون=واقدامهم ساس المشاكـل وطنـه وقررت اسمي عالم اليوم مجنـون=واطماعـه لكـل البـلاء وصلنـه |
مشكور ومبدع دئما |
القصيدة اللامية
قال الذي وان قال فكّر بماقال = معاني صورتها بالمثايل صورت فيها الحال من واقع الحال = وعندي على ماقلت بعض الدلايل صورت با لامثال عذبات الامثال = والقول ما اخذته من اقوال قايل فكرت باستدلال في خلق اهوال = ومن دقق التفكير يلقى الهوايل اللي مضى من افعال لالآف الاجيال= من كل جنس ومن جميع الفصايل كانوا بعزة حال واللي بقى اطلال = آثار بقيت مع بقايا السمايل شفت السنين اطوال والعمر لوطال= يفنى ويفنى ماتلى من سلايل العمر مهما طال لابد رحال = ويبقى محل العمرفعل الجمايل حياتنا ترحال والعمر ينزال = والناس كل فيه عدل ومايل ومهما سعى الرجال في جمع الاموال = يمشي ويتركها بليا زمايل اما عنه ينقال مرحوم رجال = يذكر بفعل الخير راع النفايل بالقلب له تمثال لو مات لازال = تبقى له الذكرى بسمح الشمايل وبعض الرجال ان زال ماهو على البال= رحل من الدنيا ماخلف صمايل يامشتكين الحال من بعض الاحوال = مهما تكون الحال من عاش زايل الحبل له فتّال وللعقد حلاّل = ذي الحقيقه من عصور الاوايل دنيا تقيم اشكال وتفرق اشكال =فيها النوقص واضحه للاصايل احذر من الجهال ياطيب الفال = الجاهلين يوردون الغوايل ومجالس الانذال مارد للاذلال = اختر جليسك من عيال الحمايل ولاتقيم الرجال بالشكل والمال = ولابانتسابه والفخر بالقبايل ياما اكثر الازوال واهل الوفا اقلال= واللي يحفظون الموده قلايل مرزوق فيهم قال وديان وجبال = وهضاب والتمثيل ماهو بعايل لكن على اية حال يبقن الاعمال = وكل يواجه ماعمل من عمايل هذاك باحسن حال وآخر با لاغلال= والحق يحصي دقها والجلايل في موقف لامال ينفع ولاخال = كل لحمله ساعة الحشر شايل حمل من الاقوال من غير الافعال = الله يوفقنا لحسن الفعايل يامنزل الانفال يامحي الاطلال = يامن يجيب بساعة العسر سايل يارب عبد شال من صعب الاحمال = حمل عسى الله يغفر الذنب هايل تغفر ذنوب اثقال ياعالم الحال = ياخير من يسأل ويارب سايل يامفني اجيال وياخالق اجيال = ادعيك يا منشي صدوق المخايل انت الامل والفال عليك الآمال = رحمتك يامعطي العطايا الجزايل |
مشكوووووور والله يعطيك الف عافيه |
الشعر والشعراء ابياتها تبين مضمونها
انا ابا استعين الله واخوض بالميدان = واشارك برايي والمعايير موجوده بامور لها في كل مجلس كلام وشان = عن الشعر واهل الشعر بابيات معدوده بعد ما لقيت الشعر ينقل وهو مرضان = نحيل هزيل ينخر البين في عوده سألته عن الاسباب وعرض وهو غضبان = لكن الاجابه جاتني شبه محدوده عرفت الاجابه والحقيقه من العنوان = وابا اقولها والهرج نقصه مثل زوده يقول السبب شعر الحداثه ويالادان = هزيل الكلام وناقص الوزن والجوده يقول الملالا عند بعض البشر ميزان = خلي من المعنى برده ومردوده يقوله قليل العرف ويغني الفنان = يجيبه قليل العرف عميان ويقوده يقول الصحافه في كثير من الاحيان = تورد كلام يجعل النفس مسدوده سبب نشرها للهزل حيثه كلام فلان = ومادامه كلام فلان ماهي بمنشوده فلا فلان متريح ولا اللي قرا فهمان = ولا الصفحة اللي تنشر فلان منشوده تفشى العبث بالشعروللعب بالاوزان = بعد جدده من خالف اباه وجدوده وله مصيبة معروفة عند كل انسان = كلام النفاق وكلمة الصدق مفقوده شعار تقول الشعر لكنهم كذبان = اهل موهبه لكنها ناس مقروده يحسبه بقول الكذب رابح وهو خسران = بعد ذمته ضاعت وعزه ومجهوده وانا ياهل المعروف والمعرفه حيران = وادافع عن الشعار والشعر ووروده وبعد ماكسرت الباب واجهت لي بيبان = ولقيت الرجال اللي على حق محسوده وابا انخى هل الغيره وابا احدد النيشان = وابي من معه بارود يرمي بباروده نبي وقفة وحده نواجه بها الغلطان = عسى بعض خلق الله ياقف على حدوده ابي وقفة بالحق في موقف الشجعان = سيوف على من جانب الحق مجروده |
صح لسان الشاعر المبدع : شاعر المجالس علي بن زيد وسلمت اناملك اخي ابو زياد على هذه الجهود الرائعة ابداع وتواصل وجهد جميل تعجز الاحرف عن اتمام ما في القلب لكم من تقدير على تلك الجهود دمت لنا مبدعا تنثر ابداعك الراقي على صفحات مجالس العز والشموخ تقبل اجمل التحايا |
شكرا لكل من اطلع على الديوان وايّد برد كتبه هنا او بدعوة بظهر الغيب له مثلها من الله وافضل ان الله جواد كريم . وارجو من الاخوان التوقف عن الردود والاكتفاء بالاطلاع فقط وذلك لقيامي بتحديث الديوان بين فترة واخرى وجمع قصائد شاعرنا وكتابة قصائد لم تكتب بعد , زهذا يتطلب بعض الوقت. |
| الساعة الآن 04:48 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO TranZ By
Almuhajir