ديوان الشاعر : حمود بن محمد العويني الفريدي

المشاركة الأصلية كتبت بواسطة منصور الوسوس

هذه القصيدة اتمنى تحوز على رضاكم

لانها اعجبتني وتحكي واقع الشعر وما يتعرض اليه من محاولات تشويه من بعض المستشعرين

اليكم القصيدة للشاعر / حمود بن محمد العويني ويسندها للشاعر نايف بن بادي الفريدي

الشعر قلّت قيمته يخو هزاع=من يوم كلٍ قام يشعب ذلوله
من يوم صار الشعر يشرا وينباع=مال القصيد المتّزن فيه جوله
تكالبت فيه المصايب والاوجاع=واستشعرت به ناس ماهي بحوله
مايحرك شعورك ولايهز الاسماع=ولافيه شيٍ لاسمعته تقوله
ناسٍ تثاغا به على قلت اسناع=مثل القطيع اللي على درب حوله
عن الشعر بعد الثريا عن القاع=قولٍ صماط ومفردات مغيوله
يوم اهجروه اهل الخزايز والابداع=مالي بسوقه يالفريدي عموله
لو ابا عددهم يضيقٍ الاتساع=واجد عباقرة القصيد الفحوله

............

[align=center][quote=منصور الوسوس;22153]هذه رائعة من روائع الشعر النبطي

للشاعر الكبير / حمود بن محمد العويني الفريدي والذي يعد من

افضل شعراء الفرده بالقصيم وله وتواجد في مناسبات ربعه الفرده

وقد اتحفنى باهداء مجموعة من قصائدة حصرية لموقع عيال راشد

نسوق اليكم هذه القصيدة اللتي وضع فيها النقاط على الحروف لمعنى

الصداقة والصديق ثم عرّ ج بنصيحة رائعة جدا اتمنى ان تحوز على رضاكم .

ماني رفيق اللي اليا جيت له صد=انا رفيقي دايمٍ مايصدي
ماكل من يضحك بوجهي على ود=بعض البشر قلبه حديدٍ مصدي
ولاتنفع الشكوا لرجلٍ ماهو قد=اللي ماهو قدٍ لها مانلدي
مانلتجي للسرمدي المسمرد=الكون واسع والوطا مسمهدي
اخير من منّاته الداب الأسود=الموت أخير من القريب المصدي
من نايدي الناس وإلا ولد جد=مايم شينين الضماير ملدي
أبيعهم وارجي كريمٍ اليا مد=ماحدٍ يماثل مدته يوم مدي
يامن تحت عرشه عباده تهجد=هو الغني والخلق غيره بشدي
سبحان من يعبد جلاله ويحمد=علاّم مايخفا على كل سدي
من هيبته حتى الطواغيت تسجد=ومن سطوته تنهد الاكوان هدي
ارجيه يمحا زلتي ويتغمد=هو العطوف لمن دعاه المودي
الله من دنيا العنا يامحمد=خيره قليل وشرها مستبدي
بين الرجا والياس والجزر والمد=ماينغبط فيها قليلة مقدي
هذا نزل فيها أمس واليوم قد شد=هذا بها ينزل وهذا يشدي
خداعةٍ بواقةٍ مالها عهد=عوباً ضلومٍ ضلمها مايردي
لاتحسبنك يابنادم مخلد=لو أمهلتك اليوم موعدك غدي
اد الحقوق الواجبة لاتردد=وخلك على صكاتها مستعدي
واحذرك من يومٍ جوارحك تشهد=شاخصةٍ الأبصار ماحدٍ يردي
خذ كلمتي يامستمعها على جد=وحذراك من غفلاتها تستمدي
أجلك ورزقك في حياتك محدد=إن قلت وان ماقلت ما نت متعدي
وامرن ما هو لله على صاحبه رد=عسى عملنا للولي مستجدي

..............

هذه القصيدة للشاعر القدير : حمود العويني
بمناسبة زواج ابن الاعلامي البارز : سعد المحارب الفريدي

( تركي )

وقد ابدع ابو ناصر كعادته فهو من ابرز شعراء الفردة حيث يقول :

يقول من هجرس ضميره وغنا=المستقيم من المثل من صفاته
من عصر ابونا نوح حتى زمنا=للشعر تاريخٍ تحفظه هواته
ياخالق المخلوق فيك استعنا=سبحان من يعلم خفا كايناته
هبت ذعاذيع القصيد وتمنا=ناسٍ تجيد العذب من مفرداته
بنات فكري في هواه إسرجنا=هاذي مواعيد القصيد وحلاته
دعوات ابو تركي لنا شرفنا=الكل لبا دعوته يوم جاته
شيخٍ مزاياه الحميده رقنا=وذربٍ مراقيب العلا من سماته
من لابةٍ وقفاتهم يعرفنا=يومٍ كلٍ نجدته من شباته
مبروك ياتركي وجعلك تهنا=والوقت تاخذ ما بقا من طراته
يا بن سعد مبروك مبروك منا=يا الوافي اللي يحتمي واجباته
جينا نبارك لبوتركي وحنا=ذخر الوطن ومساندة منجزاته
انا احمد اللي عزنا في وطنا=واختار للشعب السعودي مناته
ارواحنا لاجل الوطن يرخصنا=له الولاء منا وطاعة ولاته
اعني هل العوجاء زبون المجنا=عز الوطن ومواطنينه حماته
اعيونهم من شانا يسهرنا=ونرتاح في نومٍ عميقٍ سباته
معهم وفينا بالعهد واتكنا=على الذي ماتنحصى مكرماته
حنا قبيلة حرب ينبيك عنا =ياجاهل التاريخ نشّد رواته
هاذا وطنا فيه من يوم كنا=منا الولاء لاهل الولاء في ثباته
ابيوتنا على المكارم تبنا=تاريخ من عصر الصباح وبياته
عوق الخصيم ومن زبنّا تهنا=زبن الدخيل حماه وجهه نجاته
صديقنا لاقدم الزين زنا=تجي مكارمنا وراء مكرماته
وعدونا لاقدم الشين شنا=حنا مقابيس الوغى من بداته
وبحقوق وافين البشر ما طعنا=كلٍ بمجده تنذكر طيباته
واللي حما بيته لبيته جعنا=شعب وقياده مفلسينٍ عداته
شعب وقياده كلنا له بذنا=غاية مدى الاخلاص عزه وذاته
تمت وبالرب العزيز استعنا=اللي حما بيته وتمم صلاته

يقول الشاعر حمود بن محمد الفريدي ( ابو ناصر )
هذه القصيدة رد ثناء لصاحب الثناء
والمرؤة الاخ العزيز الشاعر الاقدير : سعد بن هذيل الفريدي
صاحب المواقف المشرفة دائماً وخصوصاً موقفه الخاص معي
الذي لايستغرب من أبو فهد فمواقفة النبيلة كثيرة وهو أهلٌ لها
حفظه الله واكثر من أمثاله ...
وقد قلت فيه هذه القصيدة

سو يافكري جزيل القول سوه=لاتجيب إلا الأباكير الجلايل
من غزيرٍ يجرح الوديان نوه=لانهمر من دافعه شال المسايل
بيّض الله وجه رجّال الحموه=عد ما تمطر هماليل المخايل
الثنا يستاهله راع المروه=اقصد ابن هذيل كسّاب الجمايل
قال قولٍ عزّني لافض فوه=وانتصرت بفعل مشهور السلايل
العلوم الغانمه عنده ضروه=مايجيب ابو فهد غير الاوايل
دايم لفزعة رفيقه به جروه=يرتكي زومان شيّال الثقايل
شد حبل المرجله ماهوب توه=واتخذها له دليل وله وسايل
اتخذها عشقةٍ له من نشوه=جادلٍ عشاقها دايم قلايل
طير شلوى للقرايب والمخوه=وبالدروب الكايده يابس بلايل
اشهد انه بالمراجل شب ضوه=حي والله من حجاج ومن فعايل
ياسعد لاهنت يا عز الدنوه=يا نجاة اللي عليه الوقت مايل
ياسليل الجود يا شذرة علوه=المدايح غير شرواكم هزايل
كثّر المولى صفاتك بالسموه=يا سليل المجد ياواف الخصايل
ما نقول النصب والقول المموه=يوم اقول القول قولي له دلايل
وجارك الله من بلا الدنيا وسوه=ومن عذاب الاخره يوم الهوايل

الشاعر : حمود بن محمد الفريدي
1431هـ
...........

السلام عليكم ورحمة الله وبركاته

كان حفل الملازم اول : كنعان بن عياد الفريدي

عبارة عن امسية شعرية ازدانت بحضور العديد من المسئولين

وعلى رأسهم الشيخ : أحمد بن سالم االقسمي من دولة الامارات الشقيقة

ومن ضمن القصائد التي القيت قصية رائعة لشاعر الكبير : حمود بن محمد العويني

وهي قصيدة جزلة لاتحتاج الى مقدمة حيث يقول ابو ناصر ::

اسم الكريم المنفرد نبدابه =علام مايخفا على الانسان
اساله التوفيق في كل يمه =وحسن العمل لاقلط الميزان
سبحان من له سبح الكون كله =وان قال كن لامر يريده كان
مشاركه ربعي فرحهم واجب= مبروك ثم مبروك ياكنعان
ندعي لكم في صالح الذريه=على الدليل وطاعة الرحمن
ومن بعدها يامرحبا بالحاضر= ترحيب دار الجدب بالودان
يا مرحبا يامرحبا حييتم= باسمي وباسم معزب الضيفان
القاسمي لبا لنا بالدعوه= شيخ الوفا لاعدوا الشيخان
باج المسافه من وفاه وطيبه= وفيت يابنك الوفا المليان
احمد ولد سالم حميد السيره= تاريخ عز وللحريب سنان
مشاهدتكم ليلة مبروكه= تفوق ما عبربه الوجدان
الله يحى اللي حضر مثنيه =عداد ما جادت به الامزان
عز الله ان الكل منكم وافي= من اجلنا طفتم على البلدان
يامرحبا من دون عد اسماكم= الكل منكم عندنا له شان
ولي الفخر في جيتي واتشرف= اليا دعاني مثل ابو سلطان
عياد بن كنعان نعم الداعي= عوق الخصيم وللكرم عنوان
اللي محله للنشاما مدهل= دايم وكفه بالصخا رويان
الله يكثر بالرفيق امثاله =ذرب بكل الواجبات احصان
من لابة بالمجتمع معروفه= للحرب حرب وللكرم ميدان
ربع تبيع الروح باول سومه= لاحول المركي ورا الذيدان
اولاد راشد محتمين التالي= قوم بساحات الوغى فرسان
الضيف لاجاهم لقا ماجوبه= كوم الغنم والا اسنمت قعدان
قوم تعز الجار وتقدر الخوي= قول اليا قلته على برهان
هاذي عوايدهم وهاذي سلومهم= ورث تساموبه من الجدان
اللابه اللي ما شكاهم جارهم= نعم العرب لاعدوا العربان
ومن صار عنده شك ينشد ويلقا =وش قال فيهم جارهم فجحان
ووش قال ابن جلعود راعي سميرا =راع العضيبا في زمانن كان
وياما وياما لو اقول الباقي= يقف القلم عن فعلهم عجزان
والناس كل له فعول تذكر= اعوذ بالخالق من البهتان
ناس فعايلهم على قد حالهم= وناس تعد فعولها الركبان
الطيب واجد بالبشر ياكثره= ما اقول ملك فلان والا فلان
وما قل دل وزبدة الهرج صايبه =قد قالها قدامنا راكان

هذا وختمها بصلاة على النبي= بالورد واليشموم والريحان

>>>>>>>>>>>

الأعزاء

في مجالسنا العامره

اسعد الله اوقاتكم بكل خير

لاشك ان الصمت في حرم الجمال جمال

ولاشك ان بصمة الكبار تبقى خالده

وعطر معانيهم يلوي الأعناق من الدهشه

ويلفت الأنظار من روعة الإبهار...ويبحر بنا الى مالا نهاية

في محيط السحر الحلال ونكاد لانرتوي من العذب الزلال

ايها الأحبة...لااعتبر هذه المقدمة سوى جملة مفيده في سيرة

ومزايا احد اضلاع الشعر...وعمالقة الكلمه...

انه الشاعر البحر...والمميز

((حمود بن محمد الفريدي)

ومع ان ابو ناصر علم غني عن التعريف

غير انني اعتبره استاذا لي...اجل

فهو من القلائل الذين اثق بشهادتهم واستفيد

من آرائهم... والدليل انني بعد ان كتبت مجاراتي للأخ الشاعر العزيز

((علي الطهيمي)) ابوعبدالله

اتصلت مباشره بأستاذي ابوناصر ....ولكم ان تتخيلوا هذا الرد

الذي لن اعلق بعد كتابته بحرف وااااااحد.

وهنا يجب ان اوضح ان مجاراته اول مجاراه كتبت

حيث شرفني بزيارته في منزلي وسلمها لي شخصيا

والتأخر في وجوده في المنتدى منّي ايضا ولكن العذر والسموحه

فوالله ان الظروف والإرتباطات احرمتني مشاركتكم

يامن جباروته على كل جبروت=رحمتك في يوم عسيرن ثبوته
فيه البشريّه ذليلين وصموت=الملك لله والعباد مخبوته
يالله يافارج ليونس من الحوت=تقبل من المسلم دعاه وقنوته
ابن دخيل الله ندبلي بريموت=ورسا على بحرالعرب جيلبوته
مثايل ماصاغها كل فتفوت=فيها من اللولو صفاه ونعوته
ماهو ركيك (ن) بالقنوات مفتوت=قول هزيل ومفردات معفوته
هذا زمن به صاحب العقل مشموت=الله يكافينا توالي اوقوته
يمسي ويصبح من قسا الوقت مبهوت=وراع المراجل ضايعات كروته
شان الزمان وشاخ به كل هتهوت=والبوم غنا يوم قامت ابخوته
واستذيب الحصني على كل عنتوت=دنيا على عكس الصحيح معموته
دنيا العنا لاتت خيار البشر لوت=فيها كثير الناس ضيّع سموته
حبل الرجا عن قاصر الشبر مبتوت=ماني رفيق الخايبين الفتوته
ارفع مقام النفس عن كل ختخوت=(كلاب الولايم)بايعين البخوته
واقدر الوافين شيمات وسموت=ماني ضعيف نظرته تحت فوته
ماني سفيه من دناياه مسبوت=جحّاه من كثر الطقوق مهتوته
ورشيد سيف للمهمات موقوت=والاّ الردي حبل رديّه بتوته

الشاعر

حمود بن الدعيس

>>>>>>>>>>>>>>