مجالس الفرده - قصه المكاين ؟؟

الموضوع منقول من صحيفه جامعه القصيم ....

أنا ومكائن الزئبق الأحمر

سمعت مثل غيري عن مكائن الخياطه اللي تباع بخمسين ألف أو أربعين ألف ريال وأنا خابرن أن الوالده
جامعتن له ألف ريال , أخذتها عشان أشتري بها اليوم مكينه وأبيعها بأضعاف ثمنها بكرة أو بعده .المهم أخذت
الألف ورحت للحراج اللي أدخله أول مرة في حياتي . وطبعا السوق زحمه والناس كلها جاءت تبيع أو تشتري .
وبحثت عن مكان أشتري منه ( بضاعتي ) ,ففوجئت بأحد الدلالين يقول لي :( حروتنك ) جديد ؟ قلت له ايش ؟
قال يعني شكلك أول مرة تجي للسوق وأنا ممكن أساعدك ,قلت له :مشكور وشرحت له أني أبغى الحين أشتري مكينه رخيصه وأبيعها بعد كم يوم بسعر عالي . وبعد شوي جاء واحد ووقف جنبي وهو يقول لي : ( انفهز ) شوي قلت له ايش ؟ قال الدلال :قصده (افحز ) قلت له : وشو ؟ قال يعني ابعد شوي . قلت ايه ,الحين
فهمت , وابتعدت له قليلا . جاء الدلال بجنبي وهمس في أذني يقول : ( ألفز ) بيدي ألف ريال ,و( الهط ) الماكينه هذي ( وطس ) عن السوق ,( طع ) شوري .. بصراحه أنا مدري من وين يجيب هالكلمات . لكن المهم فهمت أنه يبيني أشتري المكينه بألف ريال .قلت له لا .المعذرة .قال اللي واقف بجنبي الدلال : خله هذا فقير ومسكين ,أنت تحسبه من اللي ( يكوحون ) الدراهم (كو ) ؟. قلت له أنا أفا ..لا تصير هذي ( سبه ) قلي وش معنى ( يكوح ) ؟. قال الدلال : لا تزعل , يكون يعني ( يتسثح ) ؟. قلت له : ايش ؟.قال : انت ماتفهم لغه عربيه ,
يكوح يعني ( يحلت ) أو يرمي . المهم مر وقت قليل والدلال يلزم علي أشتري المكينه , بس أنا ( مطنشه ) .
قال الدلال تعال معي فيه عامل أجنبي عنده كم مكينه , ممكن يخفض لك ,ورحنا للعامل وسالته عن سعر المكينه , قال بألف ريال ,قلت للعامل : خفض السعر شوي , قال لي العامل : اسمع صديق . سعر مافيه تغيير . كلام أنا بس فوق سطح ... قلت له ايش ؟ قال الدلال : قصده أن كلمته ماتنزل الأرض ... المهم توسط بيننا الدلال وأشتريت المكينه ب 700 ريال , وجيت بعد كم يوم عشان ابيعها وأخذ المكسب , لكن بعد ما ( تمصعت ) كتوفي من شيل المكينه مالقيت أحد يشريها ولا بميه ريال . بعدها عرفت أن شعب هذي ثقافته وهذي سطحية عباراته وسوقية ( ألفاظه ) ما هي غريبه أنه ينضحك عليه بكل سهوله مثل مانضحك علي أنا وكل اللي في السوق .... ويا قلب لا تحزن ....