يا وجد حالي وجـود اللـي يتـلّ أمـه=و يقـول لا تتركيـن وليـدك الغـالـي
ما يـدري ان الليالـي جـات بمطمـه=أمـه توفـت و لا والـي و لا تـالـي
ماتت من الجـوع و هـو فاتـح فمـه=جور و مجاعـه و طاعـون و سلاّلـي
الله على الساعـة اللـي فـورت دمـه=و الله على الصورة اللي ضيّقـت بالـي
مـن شافهـا بيتذكـر حـالـة الامّــه=و بيقول يا وجد وجدي و يا بري حالي
أحدٍ ياخذ له شهر و الخبـز مـا شمّـه=و أحدٍ طعامه يجيـه الـوان و أشكالـي
أفريقيـا جوعهـا كـم مسلـمٍ سـمّـه=و حنا نبذر هـذا فـال و هـذا عقالـي
نسعى ورى المـال و نجمّعـه و نلمّـه=حـلال حـرام مـا نـدري و لا نبالـي
نشري كاسيت (نانسي) و المطرب نضمه=ندعمهم و من ورانـا جمعـوا المالـي
و العاهره اللي الخليج و شعبـه تذمّـه=حنـا وراهـا نجـرّ الصـوت ونلالـي
و نرسل ( SMS) و اللي يقصر انتمّـه=علـى قنـاة هدفهـا دمّـر الأجيـالـي
موضوع (أبو الهش) فيه الناس مهتمـه=كلـن يصـوت لـه بـدولار و ريالـي
يا ناس يـا نـاس لا غيـره و لا ذمـه=يا مسلمينٍ بالأسمـاء مـا بـه افعالـي
وشلون من ينحرف نمدحـه مـا نذمـه=و شلون ما نفرق الواطي مـن العالـي
لا صـار لا وازع ديـنـي و لا هـمّـه=لا تأمنـون العـذاب و قـدرة الـوالـي
تصدقوا و أنفقوا و العيش فـي القمـه=ما هـو بدايـم إذا وقـت النعـم زالـي
يا الله و أنا طالبك يـا كاشـف الغمـه=تحيي قلوب العبـاد و تصلـح الحالـي