ياربعنا رحنا ندور المصاليح = والعبد مايدري بغيب الليالي
قعادٍ بلا حلال من خمدة الريح = وهرجٍ بلا حصيل ياهملالي
رحنا لأبن حماد شيخ المساريح = ماكر حرارٍ من قديمٍ وتالي
الي خلط مع فرسته هبة الريح = والخيل من حسه يجيها الجفالي
بصينيته حيل السمان المفاطيح = وصفيحته بيضاء بياض الهلالي
حلياه حرٍ بالطوال اللواليح = الصيرميً اللي يصيد الجزالي
شيخٍ ينزح عاصي الضد تنزيح = من راح عنده ماعنه من يسألي
مقدم ربوعٍ مأختفوا باللحاليح = تعرف مواقفهم جنوب وشمالي
أولاد راشد كلبوهم ذوابيح = هدامة الجمع الكبير الموالي
يتلون أبن حماد بعيد المصابيح = ضيف الله اللي يحتمي للتوالي
والعلم واضح مايبا العلم توضيح = شجعان تشدأ الصايجات الجمالي
ياولاد راشد يالوجيه المفاليح = يامدلهين الجار عن كل غالي
الجار ذرا له عن سموم الوافيح = بجنابكم ينعم براد الظلالي
ياريف من مر بزمانـه سواميـح=مـن كـدرت مـاكـان بالوقت حـالـي
يأهل الوفاء يامبعدين المشاويح = ريف الخوي والضيف ودروع جالي
دخيلكم يوم الشفايا مكاليح = مثل الجدي وسهيل عسر المنالي
أمضيت ثمان سنين مرتاح ومريح = ولا هو بودي يوم قفن رحالي
فقدت همٍ جرح القلب تجريح = بجنابكم عني صدأ الهم زالي